O alcalde destacou os excelentes datos turísticos rexistrados na cidade durante o mes de maio, no que acadou unha ocupación hoteleira media do 72,67%, a máis alta da serie histórica para este mes. Segundo explicou o rexedor, a cifra supón un incremento de 17,5 puntos respecto ao mesmo período do ano anterior. “Estamos ante o mellor mes de maio da historia da cidade en ocupación hoteleira”, afirmou.
A procedencia dos visitantes confirma ademais o crecente peso do mercado internacional. Segundo os datos sinalados polo alcalde, o 48% dos turistas que se aloxaron nos hoteis da cidade durante maio foron estranxeiros, fronte ao 39% procedentes do resto de España e o 15% de Galicia.
Entre os visitantes internacionais destaca especialmente Portugal, que representa o 18,5% do total de turistas estranxeiros. Tamén sobresaen os Estados Unidos, cunha cota próxima ao 14%, consolidándose como un dos principais mercados emisores para Vigo. “Somos un destino turístico para os Estados Unidos e iso nótase na rúa, onde cada vez se escoita máis falar inglés”, sinalou Caballero. Alemaña achegou o 7,6% dos visitantes internacionais, seguida de Irlanda, cun 5,4%; o Reino Unido, con preto do 5%; e Francia, co 3,2%.
“Transformamos Vigo nunha cidade turística cun turismo de alta calidade. Seguiremos nesta liña, porque o turismo de Vigo promóvese unicamente desde o Concello”, concluíu.
