O alcalde de Ferrol, José Manuel Rey Varela, amosou, unha vez máis, o total compromiso co sector naval. Na xornada deste luns remitiu unha carta ao presidente de Navantia, á presidenta da Sepi e ao Ministro de Facenda para trasladarlles a posición da cidade de Ferrol, adoptada unanimemente polo Pleno en febreiro deste ano, ante a posible aprobación do Plan Estratéxico de Navantia 2026-2029. “Defendemos os intereses de Ferrol por riba de todo nun sector estratéxico como é o naval”, afirmou.
Durante máis de trescentos anos, Ferrol construíu a súa identidade arredor do mar e da construción naval, converténdose nun referente internacional grazas á calidade, ao coñecemento e á capacidade dos seus profesionais para deseñar e construír barcos recoñecidos en todo o mundo. Esta industria estratéxica constitúe un dos principais motores económicos e sociais da comarca. Detrás da actividade dos estaleiros da ría existe unha ampla rede de empresas auxiliares, provedores e profesionais que contribúen diariamente ao seu funcionamento e desenvolvemento. En conxunto, son miles as familias que dependen directa ou indirectamente do sector naval, un ámbito que xera emprego, riqueza e oportunidades para o territorio.
Por iso, alcalde apelou á responsabilidade e ao diálogo entre administracións para “acadar un acordo xusto que garanta crecemento, emprego de calidade e futuro para o sector”.
Rey Varela recordou que dende hai anos “vimos demandando investimentos estratéxicos que reforcen a competitividade dos estaleiros da ría”. Hoxe, unha vez máis, reclamou a construción de dous novos diques e que o Goberno do Estado invista nestas infraestruturas para asegurar o futuro dos estaleiros da ría e manter a súa competitividade a nivel internacional máis aló das fragatas F-110.
Neste sentido, insistiu na necesidade dunha maior aposta pola eólica mariña, un ámbito estratéxico que, tras anos de expectativas de crecemento, atravesa un momento de incerteza. Ademais, reivindicou o impulso definitivo á fábrica de turbinas e o reforzo dos investimentos en investigación, desenvolvemento e innovación (I+D+i).
Rey Varela considera imprescindible que o plan incorpore compromisos concretos para incrementar os cadros de persoal da empresa principal, de forma proporcional ás necesidades presentes e futuras do sector. “Esperamos ser escoitados e que o Goberno de Pedro Sánchez incorpore neste plan os investimentos e os recursos humanos necesarios para garantir o futuro de Ferrol e da súa industria naval”, sinalou.
Para concluír, o rexedor asegurou que Ferrol non vai renunciar a recuperar o peso industrial e o emprego que perdeu coa reconversión naval. “Temos o talento, a experiencia e as infraestruturas necesarias para volver ocupar o lugar que nos corresponde”.
