O 112 Galicia tivo constancia do accidente ás 16:25 horas a través de varias chamadas de particulares que alertaban dunha colisión na N-120, á altura do quilómetro 562, ao seu paso por Vilariño, no concello do Pereiro de Aguiar.
Xa nos primeiros avisos indicábase a posible existencia dunha persoa atrapada. Poucos minutos despois, o condutor dun dos vehículos implicados puido confirmar esta circunstancia ao persoal da central de emerxencias.
De inmediato, desde o 112 Galicia informouse aos efectivos do GES do Pereiro de Aguiar, aos Bombeiros de San Cibrao, á Garda Civil, á Policía Local e ao Servizo de Urxencias Sanitarias de Galicia-061.
Unha vez no lugar, os equipos de intervención tiveron que retirar unha das portas dun dos turismos para facilitar a saída dunha persoa ferida. Finalmente, esta persoa foi trasladada ao centro hospitalario de referencia xunto con outras catro que tamén resultaron feridas no accidente.
Tres persoas feridas nun accidente entre dous turismos e un camión en Santiago de Compostela
As tres vítimas tiveron que ser evacuadas ao Hospital Clínico Universitario de Santiago para recibir atención médica.
O accidente produciuse ás 17:30 horas na AP-9, á altura do quilómetro 74, ao seu paso pola parroquia de Conxo, en Santiago de Compostela.
Foi un particular quen contactou co 112 Galicia para informar dunha colisión na que se viron implicados dous turismos e un camión. Segundo indicaba, podería haber persoas feridas como consecuencia do impacto.
Tras recibir o aviso, desde o Centro Integrado de Atención ás Emerxencias informouse ao Servizo de Urxencias Sanitarias de Galicia-061, á Garda Civil, á Policía Local e aos efectivos de Protección Civil.
Finalmente, os servizos sanitarios confirmaron o traslado de tres persoas ao Hospital Clínico Universitario de Santiago de Compostela para a súa valoración e atención médica.
