O Centro Comercial Aberto (CCA) de Carballo pon en marcha unha nova campaña para dinamizar o comercio local coincidindo coa celebración do Día do Pai. A iniciativa busca premiar a fidelidade da clientela e, ao mesmo tempo, promover as compras nos establecementos de proximidade.
Baixo a idea de que existen milleiros de razóns para celebrar esta data, a campaña pretende recoñecer todos eses pequenos xestos cotiáns dos nosos pais que se transforman en amor, coidados e cariño dentro da familia. “Polas carreiras no parque, polas tiritas e os abrazos, polas tardes sen reloxo, polos teus ombreiros” son as mensaxes elixidas para identificar os establecementos participantes, convertendo así esta celebración nunha oportunidade para fortalecer os lazos familiares e apoiar o comercio de sempre á hora de atopar o agasallo perfecto.
A promoción desenvolverase do 12 ao 22 de marzo, ambos incluídos. Durante ese período, as persoas que realicen compras en calquera dos 48 establecementos participantes recibirán papeletas, que deberán cubrir cos seus datos de contacto para participar no sorteo de catro cheques de 50 euros, que poderán gastar posteriormente en calquera dos comercios asociados ao Centro Comercial Aberto de Carballo.
O sorteo celebrarase o 24 de marzo, ás 14.00 horas, e poderá seguirse en directo a través da conta de Instagram do CCA, permitindo que toda a clientela coñeza en tempo real o desenvolvemento do proceso e a identidade das persoas gañadoras.
A presidenta da entidade, Silvana Rama Corral, destacou que este tipo de campañas buscan ir máis alá do incentivo comercial. “Iniciativas como esta non só axudan a activar o comercio local en datas sinaladas, senón tamén pretenden premiar ás persoas que cada día confían no comercio local para facer as súas compras”, sinalou.
Establecementos participantes
Adega O´Lagar, Aloe herboristería, Anxaima Tempo para quererte, Atmósfera Sport, Avanty publicidade, Becool, Buy&sell, Calvelo Platería Regalo, Cenor, Clarión librería, Clínica dental Pico Blanco, Comercial Queijo, Confecciones San Juan, Confitería San Luis, Cristina Morgade, D&A Complementos, Dequip, Doces soños, Donclip, DV Carballo, Ekaté, Emiliano Moda, Florida Centro Joya, Floristería Taibo, holaMOBI, Informática Valem, Jorge Moda, Joyería Calvelo Seoane, Joyería Vessali, Lencería Mª José, Lenda, Maloserá Carballo, Maluca Lobe, Merliño xoguetería, Muebles Fuentes, Multiópticas, Óptica Enríquez, Óptica Nicolás, Orange Carballo, Oro Express, Purificación Lema Centro de estética, Rafa Vila joyerías, Refugallo Zero, Teirón, Todo Lar, upa! Espazo barefoot, Zapatillería Isabel e Zocas.
