O Concello de Carballo acolleu esta mañá a presentación oficial do XX Campionato de Galicia de Kung Fu, unha cita que reunirá á elite da base deste deporte en Galicia. Na rolda de prensa participaron José Manuel Gómez Suárez, representante da Federación Galega; José Antonio Agrelo, director do Club Kung Fu Carballo, e Daniel Barreiro, concelleiro de Deportes.
José Manuel Gómez Suárez destacou a importancia de Carballo como sede neste aniversario tan redondo do campionato. Segundo explicou, a competición contará con 120 deportistas procedentes de diversos puntos de Galicia, e subliñou que os/as clasificados/as nesta xornada pasarán directamente ao Campionato Ibérico, que se celebrará a finais de xuño.
O representante da federación quixo poñer en valor o sistema de competición, que destaca por ser “súper dinámico e visual”, cunha duración aproximada de hora e media grazas ao traballo simultáneo en tres pistas. Ademais, subliñou que o kung fu é un referente en igualdade, xa que nenos e nenas compiten exactamente na mesma categoría e condicións.
Pola súa banda, José Antonio Agrelo amosou o orgullo do Kung Fu Carballo por exercer de anfitrión, e destacou o gran peso do club no panorama autonómico: “Carballo é o terceiro club de Galicia con maior volume de deportistas presentados a competición, once en total”.
Agrelo detallou os aspectos técnicos da xornada, que incluirá categorías desde alevín ata sub-21, con competicións de formas (tao) tanto de man baleira como con armas, e diferentes niveis de cintos (verdes, azuis, marróns e negros).
Para pechar as intervencións, o concelleiro de Deportes, Daniel Barreiro, convidou a toda a veciñanza e aos afeccionados de toda a contorna a achegarse ao pavillón. “É un orgullo para Carballo acoller un evento que non só trae deporte, senón que dinamiza a nosa vila con familias de toda Galicia que veñen coñecer a nosa terra”, sinalou o concelleiro.
DATOS DO EVENTO:
• Lugar:
Pavillón Vila de Noia
• Data: Sábado, 18 de abril
• Horarios:
Apertura de portas para deportistas: 16:00 h
Apertura para o público: 16:30 h
Inicio da competición: 17:00 h
