A Xunta de Goberno do Colexio Profesional de Xornalistas de Galicia desaproba a convocatoria dunha praza de técnico ou técnica de comunicación e imaxe na Autoridade Portuaria de Vigo. Na convocatoria, malia as funcións claramente informativas do posto, só se require unha diplomatura, enxeñaría técnica ou formación profesional de grao superior.
O pasado 7 de xaneiro publicouse no Diario Oficial de Galicia a convocatoria, por parte da Autoridade Portuaria de Vigo, dunha praza de técnico ou técnica de comunicación e imaxe, en réxime de persoal laboral fixo. Nas bases da convocatoria do concurso-oposición, que se disponibilizaron na web da Autoridade Portuaria, describíanse as funcións do posto claramente de carácter xornalístico, que incluían cuestións como realizar plans de comunicación, levar a cabo a comunicación interna e externa da entidade ou desenvolver a relación cos medios. Malia iso, as mesmas bases estabelecían que a titulación mínima para optar ao posto era a dunha “Diplomatura, Enxeñaría Técnica ou Formación Profesional de Grao Superior e equivalentes”.
A decana do Colexio Profesional de Xornalistas de Galicia, Belén Regueira Leal dirixiuse por escrito a Carlos Botana Lagarón, presidente da Autoridade Portuaria de Vigo, para reclamarlle, en nome da Xunta de Goberno, a reconsideración da convocatoria e a súa substitución por outra que incluíse como requisito a titulación específica ou a colexiación, características que poden asegurar que a elaboración da información sexa tratada coas garantías e a profesionalidade que require un posto público.
Desde a Autoridade Portuaria, o director Rubén Marín Gallego respondeu nunha misiva que a categoría profesional do posto (“Técnico/a”) non permite incluír como requisito unha titulación superior á das bases, tanto polas normas de contratación aprobadas pola Dirección Xeral de Función Pública como polo III Convenio Colectivo de Portos do Estado e Autoridades Portuarias, aínda que destaca que a posesión de titulacións superiores se puntúa con máis valor que a mínima esixida. Na súa misiva, Marín Gallego non detalla nada sobre a formación específica en comunicación, limitándose a comentar a valoración dunha titulación xeral de licenciatura ou grao.
O Colexio de Xornalistas xa ten reiterado en numerosas ocasións que a única titulación que acredita que a persoa está facultada para o exercicio da profesión xornalística é a licenciatura ou grao en Xornalismo ou Comunicación Audiovisual ou, no seu caso, a colexiación no Colexio Profesional de Xornalistas de Galicia. Resulta especialmente grave que esta formación específica sexa ignorada por un organismo público como a Autoridade Portuaria, unha decisión que deteriora tanto a calidade da información que xera como as condicións laborais dos xornalistas nos seus cadros de persoal.
