A Xunta de Goberno local deu hoxe luz verde ás bases para as becas de comedor escolar e as axudas de escolarización.
O Goberno local reforza a súa aposta polo apoio ás familias ferrolás cun incremento dun 18% na partida destinada ás bolsas de comedor e ás axudas de escolarización con respecto ao curso anterior, co obxectivo de contribuír a cubrir as necesidades básicas derivadas do inicio e desenvolvemento do curso escolar.
Así, o importe máximo destinado a estas prestacións para o curso escolar 2026-2027 é de 431.000 euros, que se distribúe en dúas liñas.
A primeira delas corresponde ás bolsas de comedor escolar, dirixidas a menores empadroados en Ferrol que estean matriculados nun centro de ensino público ou concertado da cidade e que cursen segundo ciclo de Educación Infantil, Primaria, así como estudios en centros de educación especial da cidade. Tanto nos centros públicos, como nos concertados as prestacións poderán ser en concepto de almorzo e/ou xantar.
Esta liña contará cun orzamento de 371.000 euros distribuídos en 146.000 euros de setembro a decembro de 2026, e 225.000 euros para as mensualidades de xaneiro a xuño de 2027.
A segunda liña corresponde ás axudas para material escolar, cunha dotación de 60.000 euros. Están destinadas a menores de idade empadroados en Ferrol que estean matriculados nun centro de ensino da cidade e que cursen segundo ciclo de Educación Infantil, Primaria, Secundaria, Bacharelato, Formación Profesional Básica (nas súas diferentes modalidades) e Formación Profesional de Grao Medio.
A finalidade destas prestacións é dar resposta ás necesidades escolares dos nenos e nenas do Concello de Ferrol cuxas familias acrediten dificultades económicas que lles impidan afrontar os gastos correntes derivados do curso escolar, especialmente nos casos de unidades familiares que precisen dunha especial protección social.
PERSOAS BENEFICIARIAS
Poderán beneficiarse destas axudas os menores escolarizados nos centros de ensino (públicos e concertados) da cidade que estean matriculados nos cursos referidos para cada unha das liñas de axudas e reúnan os requisitos esixidos nas bases.
As solicitudes deberán ser presentadas polos representantes legais (pai, nai ou titor/a) dos/as menores que cumpran os seguintes requisitos: que a unidade familiar de convivencia estea empadroada no Concello de Ferrol, convivir cos menores para os que se solicita a axuda (no caso de custodias compartidas, so se terá en conta unha solicitude) e que os menores estean matriculados en centros escolares públicos ou concertados do municipio.
Ademais, os ingresos económicos da unidade familiar non poder superar 1,5 veces o IPREM, incrementando un 15% por cada novo membro, co límite de 1.574,09 euros, mensuais segundo o seguinte baremo: dous membros 900 euros/mes, tres membros 1.035 euros/mes, catro membros 1.190,25 euros mes, cinco membros 1.368,78 euros/ mes e seis membros 1.574,09 euros/mes.
As bases publicaranse no BOP e no taboleiro de edictos da sede electrónica municipal. O prazo para presentar solicitudes será de 15 días hábiles contados desde o día seguinte á publicación, podendo realizarse no Rexistro Xeral do Concello de Ferrol ou a través da sede electrónica municipal.
