O Concello de Lugo informa da apertura do prazo para solicitar autorización para a realización de fogueiras con motivo da celebración de San Xoán. As persoas interesadas poderán presentar a súa solicitude ata as 13.00 horas do día 23 de xuño nas dependencias da Policía Local, situadas na rúa das Artes, 33.
A alcaldesa, Elena Candia, asinou o correspondente bando municipal co obxectivo de garantir que esta tradición tan arraigada na cidade se desenvolva en condicións de seguridade para as persoas e os bens.
Entre as normas recollidas no bando figura a prohibición de utilizar combustibles líquidos ou acelerantes, así como de queimar materiais que poidan producir gases tóxicos, como plásticos, pneumáticos, colchóns, madeira lacada, gomaespuma ou outros elementos similares.
Así mesmo, todas as fogueiras, sardiñadas e grelladas deberán contar con medios de extinción adecuados, como extintores, caldeiros de auga ou area, para evitar a propagación do lume.
As fogueiras non poderán realizarse nas proximidades de liñas eléctricas, inmobles, zonas verdes ou xardíns, nin en lugares nos que poidan producirse situacións de perigo. Ademais, deberán manter unha distancia mínima de 20 metros respecto do arborado e non estarán permitidas no centro histórico.
O bando tamén establece que os responsables e organizadores deberán retirar todos os restos xerados unha vez rematada a celebración.
Por outra banda, queda prohibida a solta de globos de papel, faroliños chineses, voadores ou outros elementos similares cuxo medio de ascensión sexa o lume.
No caso de incumprimento das condicións establecidas ou ante queixas veciñais fundamentadas, e por requirimento da Policía Local, o Servizo de Extinción de Incendios poderá proceder á extinción inmediata da fogueira.
Con motivo da noite de San Xoán, tamén se autoriza a ampliación en dúas horas do horario de peche dos establecementos destinados á hostalaría, restauración e ocio da cidade, de acordo coa normativa vixente.
O Concello fai un chamamento á responsabilidade e á colaboración da cidadanía para que a celebración dunha das noites máis especiais do ano transcorra con normalidade, convivencia e seguridade para todos.
