O alcalde de Ferrol, José Manuel Rey Varela, informou que o Tribunal Administrativo de Contratación Pública de Galicia, TACGal, desestima e inadmite os tres recursos presentados por tres licitadoras contra a adxudicación do lote 1 da contratación dos servicios de recollida de residuos e limpeza viaria do Concello de Ferrol. O rexedor amosou a súa satisfacción por esta resolución, “Ferrol merece ter un servizo de recollida de basura e limpieza viaria acorde coas necesidades actuais tras máis de dunha década de espera por un novo contrato”.
O pasado 9 de febreiro a Xunta de Goberno local aproba adxudicar o lote 1, Servizos de recollida e transporte de residuos, limpeza viaria e limpeza de praias, á UTE Copasa-Setec por un importe de 11.290.480,72 euros/ano e cunha duración de dez anos.
O 4 e 5 marzo o TACGal remitía ao Concello de Ferrol os tres recursos presentados contra esta adxudicación, polo que quedaba en suspenso a tramitación do procedemento, e dende a administración local remitíase o expediente acompañado dos informes técnicos e xurídicos. “Quero agradecer aos funcionarios municipais e ao concelleiro de Servizos que traballaron moito durante estes anos para renovar o servizo e para que Ferrol teña unha limpeza á altura da gran cidade que somos”, destacou o rexedor.
Agora tras esta resolución, indícase que o traballo municipal feito foi adecuado e levántase dende hoxe a suspensión automaticamente e o departamento de Contratación xa requiriu á adxudicataria a documentación necesaria para a formalización do contrato.
“Esperamos que poida firmarse xa este mesmo mes”, avanzou o rexedor, “para que ao longo deste ano os ferroláns poidan comezar a notar as melloras na prestación do servizo”.
IMPLANTACIÓN PROGRESIVA DO NOVO SISTEMA
A UTE adxudicataria presentará un plan detallado para a implantación do servizo, no que se contemple tanto a redistribución do persoal subrogado como a incorporación de nova maquinaria.
Co inicio do novo contrato, o servizo de recollida de residuos se reforzará en ocasións especiais como festas patronais, mercadillos ou outros a solicitude do Concello de Ferrol, así como en situacións de maior xeración de residuos (Nadal, fin de ano…) mediante servizos extraordinarios.
Pola súa parte, a limpeza viaria organizarase en quendas de mañá, tarde e noite, tanto en días laborais como festivos, co fin de asegurar un nivel adecuado de limpeza en todo o termo municipal.
NOVOS CONTENEDORES
A cidade disporá de novos contedores de deseño ergonómicos, pensados para facilitar o seu uso pola veciñanza. Os contedores soterrados actuais deixarán de utilizarse, xa que a diversidade de modelos e a complexidade das tarefas de limpeza e mantemento veñen dificultando dende hai anos o seu funcionamento.
Como novidade, implantarase un sistema electrónico de identificación automática de contedores mediante trasponders ou etiquetas de identificación por radiofrecuencia para controlar o seu estado e uso.
Ademais, prevese reforzar o mantemento dos areais durante todo o ano, medida que se aplicará xa este verán, cando a nova empresa asuma tamén a instalación e retirada dos equipamentos temporais nas praias durante a tempada alta.
DESBROCES E BRIGADAS MULTIUSO
A semana pasada comezaron os desbroces no rural, a través dun contrato, ao que agora sumarase de maneira estable o servizo de desbroces. “Estableceremos un mínimo de actuacións tanto na zona urbana como no rural, daremos cumprimento a unha das principais demandas que nos trasladan os veciños”, afirmou o rexedor.
Ademais, como consecuencia da implantación da carga lateral, están previstos catro equipos de roza mecánica e a creación de cinco brigadas multiuso, formadas por un condutor e dous peóns cada unha, operativas de luns a venres durante todo o ano.
Para a prestación do servizo, o municipio divídese en dúas zonas: a urbana e a rural. A frecuencia de recollida no ámbito urbano será de seis veces por semana en horario nocturno, mentres que no rural será de tres veces por semana en horario diúrno. A recollida de voluminosos realizarase seis días á semana.
RECURSOS HUMANOS E MATERIAIS
Tal e como xa avanzou no seu día o rexedor, e tal e como se recolle nos pregos, a UTE adxudicataria subrogará a totalidade do persoal con dereito legal á subrogación, que actualmente ascende a 134 traballadores, respectando as condicións laborais vixentes. Os uniformes e os equipos de protección cumprirán estritamente a normativa vixente en materia de seguridade e saúde e prevención de riscos laborais.
En canto aos medios materiais, todos os vehículos e maquinaria serán de nova adquisición, agás os achegados polo Concello de Ferrol, e empregarán tecnoloxías contrastadas. As furgonetas e sopladores serán eléctricos, e os vehículos lixeiros deberán contar coa etiqueta 0 emisións da DXT. A inversión para dotar de novos equipos e novos recursos ao servizo será de 12 millóns de euros.
O alcalde concluíu afirmando que “Ferrol contará con servizo de recollida moderno, eficaz e respectuoso co medio ambiente para ter unha cidade máis limpa e con maior calidade de vida”.
