O Parlamento aprobou, hoxe, reclamar ao Goberno de Pedro Sánchez o reforzo inmediato de efectivos da Unidade de Policía Adscrita de Galicia. A iniciativa do Grupo Parlamentario Popular, que saíu adiante sen votos en contra, solicita, tamén, a integración dos efectivos da Policía Nacional e da Garda Civil de maneira presencial no 112, como acontece noutras Comunidades.
A viceportavoz do Grupo Parlamentario Popular e secretaria xeral do PPdeG, Paula Prado, advertiu do recorte do persoal da UPA en Galicia en máis dun 30%, que supuxo que, nestes últimos anos, unha perda media de nove policías ao ano. “O Goberno central nin está nin se lle espera cando urximos que cubra as vacantes da Unidade de Policía Adscrita de Galicia”, denunciou, para continuar explicando que, a día de hoxe, o número real de efectivos é de 335, unha cifra moi por debaixo dos 500 que lle corresponden á nosa Comunidade, tal e como figura no catálogo aprobado en 2007, o cal cualificou de “obsoleto e incompleto”.
Paula Prado recordou que tanto desde o PPdeG como desde a Xunta reclamouse, en diferentes ocasións, a cobertura de prazas desta unidade, un corpo “clave” para garantir a seguridade, pero “nunca temos resposta”: “O ministro de Interior prometeu 50 axentes máis para Galicia e, catro anos despois, non só non chegaron eses axentes, senón que a UPA, cada vez, ten máis vacantes sen cubrir”. Ao mesmo tempo, fixo referencia á situación actual do corpo policial, no que tres de cada dez postos están vacantes, a falta de mandos dificulta os labores organizativos e no que moitos efectivos teñen que deixar de facer funcións operativas para poder desempeñar labores administrativos.
Para rematar, a viceportavoz popular apelou “á conciencia nacionalista” para que a nosa Comunidade teña un trato preferente e instou ao BNG “deixe de ser cómplice” do Goberno central “a cambio de nada para Galicia”.
Así, afeou á dobre vara de medir do Goberno central entre Comunidades, xa que, tal e como dixo, pretende que Galicia asuma o 50% do custe das nóminas: “En lugar de darlle a Galicia unha situación diferenciada, o que fai é castigala con menos recursos”. Ademais, recordou que os gastos de funcionamento e as produtividades xa corren a conta da Xunta.
CENTRO DE ALTO RENDEMENTO DE GALICIA
Por outra banda, o deputado popular Argimiro Marnotes avogou pola participación do tecido deportivo galego no deseño do futuro centro de alto rendemento de Galicia. Así, a través dunha proposición non de lei, aprobada por unanimidade, explicou que, para que sexa unha infraestrutura útil, moderna e verdadeiramente adaptadas ás necesidades do deporte galego, hai que escoitar ás federacións que son, dixo, “as que coñecen a realidade de cada modalidade, saben das carencias actuais, traballan cada día cos deportistas e poden achegar unha visión técnica imprescindible”.
“Pedimos que o deseño dunha infraestrutura estratéxica conte coa voz de que logo a vai utilizar, aproveitar e poñer ao servizo dos deportistas galegos”, apuntou. E sinalou que o futuro centro dará resposta ao crecemento que o deporte galego vén experimentando nos últimos anos. Galicia conta con máis de 1.800 persoas con recoñecemento vixente no ámbito do alto nivel, do alto rendemento e do rendemento deportivo de base, ademais de adestradores, árbitros, xuíces e deportistas de alto nivel vitalicio.
