O Parlamento de Galicia aprobou, hoxe, instar ao Goberno central a que aplique o IVE superreducido do 4% a todas as modalidades de vivenda protexida.
A iniciativa do Grupo Parlamentario Popular, que saíu adiante sen votos en contra, avoga porque o Executivo de Pedro Sánchez adopte as modificacións normativas necesarias para facer efectiva esta medida e abordar «dun xeito decisivo» a mellora da fiscalidade en materia de vivenda.
Segundo o deputado do Grupo Parlamentario Popular, Moisés Rodríguez, a carga tributaria que soporta unha vivenda ao longo de todo o seu proceso de promoción, construción e adquisición pode representar entre o 25% e o 30% do seu prezo final. Así, fixo fincapé nos «importantes efectos positivos» desta medida, tanto desde o punto de vista social como económico, xa que contribuirá a reducir o prezo final, permitirá reforzar a viabilidade económica de moitas promocións de vivenda protexida, favorecendo que máis promotores aposten por este tipo de desenvolvemento residencial, e, tamén, suporá un incentivo directo á construción de vivenda accesible.
O Goberno galego, mediante alegacións ao Plan estatal de vivenda 2026-2030, reclamoulle ao Executivo de Pedro Sánchez que impulsara dita modificación normativa que permitira estender o tipo superreducido do 40% do Imposto sobre o Valor Engadido a todas as modalidades de vivenda protexida, e non unicamente ás vivendas protexidas de réxime especial. Porque pasar do 10% actual ao 4%, tal e como demandan os populares, «suporá un notable aforro para os adquirentes».
Durante a súa intervención na Comisión 2ª, aproveitou para pór en valor a aposta decidida do Goberno galego neste ámbito, destacando o «enorme esforzo» para dar unha resposta efectiva antes as dificultades actuais de acceso. E fixo fincapé nas 4.000 novas vivendas de promoción públicas en construción, o desenvolvemento de chan para dispoñer 25.000 novos fogares –o 80%, protexidos-, rehabilitando e desburocratizando e axilizando os procedementos.
