O Foro Territorios Patrimonio celebrou hoxe a súa décima edición en Bodegas Regina Viarum, en Sober, nun momento decisivo para o futuro da Ribeira Sacra. O encontro converteuse na última gran cita pública de reflexión e diálogo sobre o territorio antes de que o Comité do Patrimonio Mundial da UNESCO examine a súa candidatura a Patrimonio da Humanidade, unha decisión prevista inicialmente para o vindeiro luns 27 de xullo.
Neste contexto, o X Foro Territorios Patrimonio reuniu máis dunha quincena de voces expertas dos ámbitos institucional, empresarial, cultural, turístico, patrimonial e da comunicación para analizar os retos presentes e futuros dun territorio que afronta unha semana determinante para o seu recoñecemento internacional.
Baixo o título Patrimonio, territorio e futuro: unha conversa necesaria, a xornada defendeu a necesidade de entender os territorios rurais como espazos vivos, nos que a conservación do patrimonio e da paisaxe debe convivir coa actividade económica, a creación de oportunidades, a sustentabilidade e a implicación das comunidades locais.
Apertura institucional
A apertura institucional contou coas intervencións de Carlos Montilla, director do Foro Territorios Patrimonio; Luis Fernández, presidente do Consorcio de Turismo da Ribeira Sacra e alcalde de Sober; Anxo M. Lorenzo, director xeral de Cultura da Xunta de Galicia; e Paz Rodríguez Rivera, directora xeral da Axencia Galega de Desenvolvemento Rural (AGADER).
Durante o acto destacouse o valor da cooperación entre administracións, empresas, entidades sociais e axentes locais para protexer a identidade da Ribeira Sacra e construír un modelo de futuro coherente coas características singulares do territorio. A proximidade da decisión da UNESCO estivo moi presente nunha apertura que puxo en valor o traballo colectivo desenvolvido arredor da candidatura coa reflexión de que pase o que pase coa candidatura, a Ribeira Sacra é patrimonio e un territorio de gran valor e futuro.
Sustentabilidade, comunicación e patrimonios rurais
A primeira mesa, Un territorio en equilibrio, un territorio sostible, analizou a convivencia entre patrimonio natural, paisaxe, infraestruturas, enerxía e actividade económica. Participaron Marisol Díaz Mouteira, directora xeral de Patrimonio Natural; Rosa Ana Suárez de la Puente, responsable da área de Operación Remota, Presas e Concesións Hidráulicas en Naturgy; Marina Serrano, presidenta de AELEC; e Iván Gómez, director do grupo Hogomar, coa moderación de Marcos Pérez Gulín, da Fundación Galicia Rural Sustentable.
A continuación, Como nos ven. Estratexias responsables de comunicación abordou a responsabilidade de construír relatos respectuosos coa identidade e coa realidade dos territorios. A conversa reuniu a María José Imia, responsable de comunicación do Xacobeo; Lara López, escritora e directora de programas en RNE Audio e Radio Clásica; Miguel Conde-Lobato, presidente fundador de BapConde; e Carlos Montilla, director do Foro. Moderou Sara Meijide, xefa de contidos de Radio Lugo Cadena SER.
O programa incluíu tamén a presentación de proxectos singulares vinculados á Ribeira Sacra, como exemplos de novas formas de conectar patrimonio, creatividade, emprendemento e desenvolvemento local.
A mesa Patrimonios Rurais reuniu diferentes perspectivas sobre a planificación territorial, a xestión do patrimonio, a cooperación e as oportunidades económicas e sociais vinculadas ao rural. Participaron María Paz Rodríguez Rivera, directora xeral de AGADER; Manuel Rodríguez, director da Fundación RIA; Marco Sousa, director do Departamento Operacional de Turismo do Porto e Norte de Portugal; e Luis Fernández, presidente do Consorcio de Turismo da Ribeira Sacra. A moderación correu a cargo de Alexandra Seara, xerente do Consorcio.
Unha tarde conectada co territorio
Pola tarde, o programa estenderase ao propio territorio cunha visita ao encoro de Belesar organizada en colaboración con Naturgy. Durante o percorrido, responsables da compañía achegarán aos participantes unha visión sobre o funcionamento das infraestruturas hidráulicas e a súa relación coa paisaxe, a produción enerxética e a contorna. O X Foro Territorios Patrimonio pecharase cunha visita á Adega Vía Romana, completando a xornada.
Organizado por i-radia Crea, o X Foro Territorios Patrimonio conta co patrocinio institucional da Xunta de Galicia, a través da Axencia Galega de Desenvolvemento Rural e da Consellería de Cultura; co patrocinio de Naturgy; e coa colaboración de Labauh e Bodegas Regina Viarum.
