O delegado do Goberno en Galicia, Pedro Blanco, puxo en valor o esforzo do Goberno na defensa e restauración ambiental do litoral de Carballo, que suma un investimento superior a 1,7 millóns de euros para protexer a costa e anticiparnos aos efectos do cambio climático. O delegado supervisou esta mañá na Praia de Razo, xunto co subdelegado do Goberno na Coruña, Julio Abalde, e o alcalde de Carballo, Daniel Pérez, as actuacións de protección ambiental e loita contra a erosión que o Ministerio para a Transición Ecolóxica e o Reto Demográfico está a executar na praia de Razo cun investimento de 1,3 millóns, que se suman ás actuacións xa executadas en Baldaio e Razo para a protección do sistema dunar, cun investimento duns 450.000€.
No que atinxe á actuación principal en Razo, que se retomou tras a sucesión de temporais deste inverno, as obras permiten frear os efectos erosivos, estabilizar os taludes e reforzar as defensas naturais da costa mediante escolleras, “tablestacas” de madeira e retranqueos do viario perimetral, adaptando as infraestruturas á realidade climática e priorizando a seguridade e o uso peonil.
Estas intervencións complétanse coas actuacións xa executadas en Razo e Baldaio, cun investimento de 450.000 euros do Plan de Recuperación, Transformación e Resiliencia, centradas na protección do sistema dunar mediante acordonamentos, pasarelas de madeira e eliminación de elementos degradados. Este proxecto forma parte dunha actuación máis ampla que permitiu restaurar 34 quilómetros de costa na provincia da Coruña, cun orzamento superior aos 2,5 millóns de euros.
O delegado incidiu en que o Goberno “actúa con responsabilidade e visión de futuro” e salientou que protexer Razo e Baldaio é garantir un litoral vivo, seguro e ben conservado para as vindeiras xeracións. “O Goberno ten unha política clara, que é investir para protexer a nosa costa e anticiparnos aos efectos dun cambio climático que non se combate con discursos, senón con previsión e recursos”, sinalou. Así, subliñou que o Goberno seguirá investindo con rigor para coidar a nosa costa, garantindo que as xeracións futuras herden un litoral máis resiliente, máis seguro e mellor preparado fronte aos temporais e aos efectos do cambio climático”.
Regulamento Xeral de Costas
Durante a visita, Pedro Blanco pediulle rigor á Xunta respecto á modificación do Regulamento Xeral de Costas e subliñou que o Goberno está a cumprir coa normativa europea para evitar posibles sancións a España, lembrando que o procedemento está aberto á consulta pública e conta con canles formais de participación nas que poden participar as comunidades autónomas. “Falar de porta de atrás é faltar á verdade”, afirmou, ao tempo que insistiu en reclamarlle á conselleira de Medio Ambiente, Ángeles Vázquez, “rigor e responsabilidade” fronte ao “ruído e alarmismo interesado”. Fronte a isto, o delegado reiterou que o Goberno actúa con transparencia, diálogo e respecto ás competencias.
