O delegado do Goberno en Galicia, Pedro Blanco, situou esta mañá en Ourense a economía social como unha oportunidade para dar resposta ao reto demográfico en Galicia. Pedro Blanco inaugurou o seminario internacional de Emprego Sostible desenvolvido pola Universidade de Vigo (UVigo) na Facultade de Dereito do seu Campus de Ourense e impulsado polo proxecto Rights EU da Unión Europea.
Pedro Blanco salientou a provincia de Ourense como epicentro do esforzo do Goberno de España no reto demográfico. “En Ourense a economía social contribúe a que a cidadanía desenvolva un proxecto vital na súa terra, facilita a prestación de servizos adaptados ás necesidades sociais e fai todo isto, ademais, desde unha lóxica de arraigo, de compromiso co entorno e de sustentabilidade a longo prazo”, indicou o delegado, quen definiu a economía social como un modelo “que non só produce bens e servizos, senón que tamén xera igualdade social e equilibrio territorial”.
Neste sentido, o delegado sinalou a nova Lei de Economía Social como unha aposta do Goberno que supón a culminación do seu compromiso co sector e que nace do consenso con el. “Faino poñendo ás entidades sociais no centro, evitando o intrusismo laboral, dándolles máis relevancia na contratación pública e dotando dun marco normativo máis beneficioso ás cooperativas”.
O delegado subliñou que este camiño legal non pode percorrerse sen o coñecemento e a experiencia de quen dedica o seu labor ao estudo, á análise e á práctica do dereito do traballo e das dinámicas económicas e sociais. Por iso puxo en valor a importancia do foro levado a cabo pola Universidade de Vigo, xa que “sen o traballo da academia, sen a súa capacidade de cuestionar, medir e propoñer, sería imposible construír e soster o noso Estado de Benestar”.
