A Xunta de Goberno local aprobou hoxe a licitación dos servizos de coordinación integral e dirección de obras (lote 1), así como da coordinación de seguridade e saúde (lote 2) das obras comprendidas no proxecto básico e de execución de Abrir Ferrol ao Mar. Entorno Caranza e Telleiras. O primeiro lote sae a contratación por un importe de 43.892,24 euros e o lote 2 por 6.827,68 euros.
“Seguimos avanzando na última fase de Abrir Ferrol ao Mar”, destacou o alcalde, José Manuel Rey Varela, quen lembrou que a licitación das obras desta actuación xa se atopa en mesa de contratación e que ao proceso concorreron dúas empresas.
O rexedor puxo en valor tres fitos acadados na xornada de hoxe. O primeiro deles foi o inicio dos traballos de instalación da nova verxa na avenida de Irmandiños, así como o desvío do tráfico na rúa da Igrexa, á altura do teatro Jofre, o que permitirá avanzar nas actuacións previstas neste ámbito para mellorar o espazo da praza de Galicia.
O segundo fito corresponde ao comezo dos traballos de demolición da muralla de Navantia, na fase correspondente a Esteiro. Rey Varela agradeceu a colaboración do Ministerio de Defensa e de Navantia para facer posible esta actuación, que cualificou como “un cambio moi importante para a cidade e, especialmente, para o barrio de Esteiro”, ao favorecer unha maior integración deste espazo coa contorna urbana.
O terceiro fito foi a aprobación dos servizos de coordinación integral e dirección das obras, así como da coordinación de seguridade e saúde, correspondentes ao proxecto básico e de execución de Abrir Ferrol ao Mar no ámbito de Caranza e Telleiras. Este paso permitirá continuar coa tramitación administrativa e avanzar cara á execución desta actuación estratéxica para a transformación da fachada marítima da cidade.
NOVOS ESPAZOS E APOSTA POLA MOBILIDADE
O proxecto Abrir Ferrol ao Mar-Caranza é unha actuación estratéxica para a rexeneración da fronte marítima e a mellora da calidade urbana. Esta actuación conta cun investimento de 1.160.706,09 euros e un prazo de execución de 13 meses.
A intervención contempla unha reorganización integral da contorna, coa mellora da mobilidade peonil e ciclista, o reforzo das conexións co tecido urbano e a creación de novos espazos de estancia, lecer e convivencia. Neste sentido, reordenaranse os percorridos do bordo litoral e acondicionaranse os accesos transversais cara a Caranza e aos equipamentos próximos, favorecendo desprazamentos máis seguros, cómodos e accesibles.
O proxecto inclúe tamén a creación de dous novos estacionamentos: un na rúa Fonte da Greza, con 24 prazas, e outro entre a rúa Telleiras e a rúa 5, con 50 prazas, das que tres estarán reservadas para persoas con mobilidade reducida. En total, habilitaranse 74 novas prazas de aparcadoiro. Ademais, renovarase o estacionamento existente na parte traseira do auditorio, con capacidade para 52 vehículos.
Esta actuación está cofinanciada pola Axencia Galega de Infraestruturas (AXI) segundo o convenio de colaboración co Concello de Ferrol, e poderá ser cofinanciado pola Unión Europea a través do Fondo Europeo de Desenvolvemento Rexional (Feder) no marco do programa plurirrexional de España 2021-2027 dentro da Estratexia de Desenvolvemento Integral Local (Plan Edil).
LICITACIÓN AGLOMERADO AVENIDA CASTELAO
Rey Varela avanzou, tamén, que a XGL aprobou a contratación das obras de aglomerado da Avenida de Castelao, cuxo proxecto foi aprobado a semana pasada.
A actuación contará cun investimento de 360.135,59 euros e permitirá renovar unha superficie de 10.446 metros cadrados nunha das vías con maior intensidade de tráfico do barrio, dende o auditorio ata o complexo deportivo Javier Gómez Noya.
A este aglomerado súmanse a distintas actuacións de mellora que se están levando a cabo no barrio de Caranza como as obras de conservación e mantemento da envolvente do centro cívico (499.475,90 euros); as obras de accesibilidade no ámbito das rúas Sao Paulo, Padre Feijóo e Armada Española (88.759,76 euros), a renovación da sinalización horizontal, tarefas de limpeza e desbroces e a mellora da accesibilidade á praia de Caranza xunto á construción do talude (250.000 euros).
Investimentos aos que suman os que se están executando en diferentes instalacións deportivas e que suman en total preto de catro millóns de euros neste barrio.
