O persoal do sector de transporte de mercadorías por estrada, convocado polos sindicatos CCOO, CIG e UGT, protagonizou este xoves unha concentración no polígono do Tambre, en Santiago de Compostela.
Os sindicato denuncian o bloqueo da negociación do convenio colectivo por parte da patronal, á que reclaman retomar o diálogo con vontade de alcanzar un acordo que garanta salarios dignos e mellores condicións laborais.
Denuncian que a proposta empresarial para 2026 non garante o mantemento do poder adquisitivo, limita a actualización salarial ao salario base, elimina a retroactividade desde o 1 de xaneiro e continúa sen atender reivindicacións como a remuneración do traballo nocturno e do traballo en domingos.
