Esta mesma mañá, apenas uns minutos despois das sete, os bombeiros da cidade de Ourense acudiron a un domicilio situado na Rúa da Serra da Queixa por mor dunha intensa fumeira, que era visible desde distintos puntos da contorna.
Á súa chegada, os efectivos do parque municipal comprobaron que a orixe de tanto fume era un lume nun colchón, posiblemente a causa da batería dun móbil. Debido á acumulación de fume, que afectou por completo á vivenda, unha persoa, unha moza, tivo que ser evacuada ao Complexo Hospitalario de Ourense con síntomas de intoxicación.
Os xestores do 112 Galicia tiveron coñecemento do suceso mediante o mesmo equipo de extinción e solicitaron a colaboración dos profesionais de Urxencias Sanitarias de Galicia-061 e dos axentes da Policía Local.
Outras dúas persoas afectadas en Maceda
Por outra banda, ao fío da medianoite, en Maceda, outras dúas persoas necesitaron asistencia sanitaria tras inhalar fume dun incendio na cociña.
Segundo a información recollida no 112, faltaban apenas uns minutos para a medianoite cando os afectados contactaron co servizo de atención telefónica ás emerxencias debido a un incendio na cociña, que trataron de apagar aplicando un extintor. Sen embargo, o fume era persistente e impedíalles respirar ben.
Deste modo, acudiron os profesionais de Urxencias Sanitarias de Galicia-061 e os membros do GES de Maceda, que remataron de apagar un incendio con orixe nunha tixola.
Pola súa parte, o equipo médico encargouse da atención dos afectados e do seu traslado ao centro médico de referencia, pois presentaban síntomas de intoxicación por inhalación de fume.
Os feitos ocorreron nunha vivenda situada na Rúa Cardenal Quiroga, en Maceda.
