O Concello de Vigo aplicará de forma progresiva, a partir do 1 outubro de 2026, a nova ordenanza. Así o lembrou no Pleno Municipal de hoxe o concelleiro de Orzamentos e Facenda, Jaime Aneiros, ao incidir en que, co obxectivo de seguir recibindo turistas, Vigo fixa un período transitorio de aplicación da norma, tanto aos establecementos de hostalería como ás operadoras que aplican a recarga sobre o imposto autonómico.
A regulación de Vigo establece, transitoriamente, que ata xullo de 2027 só se poderán gravar 2 noites do máximo legal, e que os cruceiros contarán cunha moratoria dun ano para aplicala.
Aneiros destacou que Vigo conta cunha tributación moderada na taxa turística en comparanza coas cidades onde xa se aplica. Explicou que a tarifa é un 27 por cento máis barata que as de Santiago e A Coruña, e menor ás de Barcelona, Bilbao, Lisboa e Porto. “Colócanos como a cidade máis barata e co menor imposto sobre as estancias turísticas non só da fachada atlántica da península, senón do contexto norte do Estado Español”, recalcou o concelleiro.
Contías:
▪ Hotel 5 estrelas, 5 estrelas superior e 4 estrelas superior: 2€
▪ Hotel 4 estrelas, 3 estrelas superior, 3 estrelas e 2 estrelas superior: 1,60€
▪ Hotel 2 estrelas, 1 estrela superior e 1 estrela: 1,20€
▪ Pensións: 1,20€
▪ Albergues, campamentos de turismo, establecementos de turismo rural, apartamentos turísticos e vivendas turísticas: 0,80€
▪ Vivendas de uso turístico: 1,60€
▪ Embarcacións de cruceiro turístico: 1,20€
