Abel Caballero celebrou a concesión da décima Vasoira de Platino á cidade, un recoñecemento que se recolle hoxe en Madrid e que acredita a excelencia do servizo municipal de limpeza. O tenente de alcalde, Javier Pardo, responsable desta área, foi o encargado de recibir o galardón en representación do Concello.
Caballero lembrou que, desde a súa chegada á Alcaldía en 2007, Vigo obtivo todas as Vasoiras de Platino convocadas con carácter bienal. “Cando cheguei non había ningunha; desde entón conseguimos todas as edicións”, destacou o rexedor, que puxo en valor a continuidade dun modelo baseado na innovación e na mellora constante dos servizos públicos.
Segundo explicou, a organización do premio distingue especialmente o proceso de dixitalización implantado na xestión da limpeza urbana e a capacidade do Concello para analizar datos específicos por rúas, zonas e barrios. Esta información permite optimizar os recursos e focalizar as actuacións onde son máis necesarias, incrementando a eficacia do servizo e mellorando os resultados.
Caballero lembrou que o dispositivo municipal de limpeza atende unha rede de 2.303 quilómetros e presta servizo aos preto de 300.000 habitantes da cidade, garantindo a conservación e mantemento do espazo público. “O conxunto da cidade sabe que Vigo é unha cidade limpa”, concluíu o alcalde.
