O Concello O programa de Envellecemento Activo ACTÍVATE, promovido polo Concello deVimianzo, celebrará o vindeiro venres 5 de xuño de 2026, en horario de 11:00 a 14:30horas, a Segunda edición das Olimpíadas de Xogos Tradicionais, unha iniciativa xaconsolidada como espazo de convivencia, participación e lecer dentro do programa municipal de envellecemento activo.
A xornada reunirá a 150 persoas participantes procedentes das parroquias de Serramo, Vimianzo, Calo/Pasarela, Tines, Treos, Bamiro, Baíñas, Berdoias, Castrelo, Cereixo, Salto, Carnés e Cambeda, que compartirán unha mañá dedicada á práctica e recuperación dos xogos populares, reforzando o éxito acadado na primeira edición e dando continuidade a unha proposta que combina actividade física, estimulación cognitiva e interacción social.
Ao longo da mañá desenvolveranse distintas probas e dinámicas arredor de xogos tradicionais como o aro, a ra, as argolas, a chave, os arrastramortos, os bolos, aspalabras encadeadas e o sete e medio, actividades que fomentan a coordinación, a habilidade, a memoria, a concentración e o traballo en grupo, adaptadas ás capacidades das persoas participantes.
A incorporación destes xogos ao programa ACTÍVATE foi posible grazas ao financiamento da Deputación da Coruña, permitindo introducir unha dimensión lúdica e cultural que complementa o traballo realizado no ámbito do envellecemento activo. Ademais, ao longo do ano, as persoas participantes estiveron practicando estes xogos cunha periodicidade mensual, integrándoos dentro da programación habitual e combinándoos co resto de actividades do programa. Esta continuidade permitiu non só recuperar prácticas tradicionais senón tamén reforzar a participación, a aprendizaxe compartida e a preparación para esta segunda edición das olimpíadas.
A iniciativa ten como obxectivo promover hábitos de vida activa e saudable, fortalecer os vínculos sociais e crear espazos de encontro entre as persoas maiores, ao tempo que contribúe á recuperación e conservación dun patrimonio lúdico tradicional que forma parte da memoria colectiva do municipio.
Desde o Concello de Vimianzo destacan a excelente acollida desta actividade, que se consolida dentro do programa ACTÍVATE como unha proposta que favorece a participación social, o benestar emocional e a dinamización comunitaria das persoas maiores, ao tempo que reforza o sentimento de pertenza e convivencia entre parroquias a través do xogo e da tradición.
