A Federación Galega de Municipios e Provincias (FEGAMP) recentemente aprobou o seu Manifesto con motivo do 8 de Marzo 2026, que acaba de ser enviado a todas as entidades locais galegas (313 concellos e 4 deputacións) para que poida ser abordado nos seus respectivos plenos de febreiro para a conmemoración do Día das Mulleres o vindeiro 8 de Marzo.
No manifesto, a FEGAMP pon “o foco nas mulleres como xestoras transformadoras dos seus pobos e cidades, facendo gala dun compromiso e coñecemento do territorio que posibilita que os investimentos non se concentren só nos grandes núcleos urbanos, senón que contribúan á cohesión territorial de toda Galicia e a un desenvolvemento máis equilibrado”, falando de “mulleres traballando en ámbitos e funcións chave na xestión municipal como a planificación de servizos, o deseño dos pobos e das cidades, a xestión económica, a contratación pública ou programando e prestando servizos á comunidade”.
Para a federación municipalista este traballo é “esencial para garantir a continuidade, a estabilidade institucional e a mellor atención, mesmo en situacións complexas como recentemente aconteceu coa pandemia do Covid” e resultou determinante “para facer fronte a un dos maiores desafíos do municipalismo como foi a xestión dos fondos europeos do Mecanismo de Recuperación e Resiliencia, coñecidos como Next Generation EU”.
O manifesto fai referencia a que neste 8 de Marzo de 2026 “a ONU une a mulleres e nenas para esixir igualdade real de dereitos e unha xustiza para facer valer, exercer e desfrutar eses dereitos” na súa conmemoración. E nesa liña a FEGAMP poñe o acento no labor imprescindible das mulleres como xestoras públicas, evocando a Maruja Gómez, a primeira muller alcaldesa elixida democraticamente en Galicia no ano 1936 na Cañiza (Pontevedra), e a todas as mulleres que foron asumindo os bastóns de mando nos concellos galegos.
Remata o manifesto co compromiso da FEGAMP “para seguir visibilizando ás mulleres como xestoras do público, exercendo o poder e eliminando barreiras que aínda dificultan a seu acceso a postos de responsabilidade”, promovendo a visibilización e o recoñecemento das mulleres “non só como protagonistas da igualdade, senón como xestoras do cambio, responsables directas de construír, dende o ámbito local, un mellor futuro”.
