O subdelegado do Goberno na Coruña, Julio Abalde, reuniuse coa decana da Facultade de Dereito da Universidade de Santiago de Compostela, Ana María Gude Fernández, para presentarlle a nova convocatoria das bolsas SERÉ 2026, impulsadas polo Ministerio da Presidencia, Xustiza e Relacións coas Cortes.
Estas axudas, dirixidas a persoas que preparan oposicións para xuíz, fiscal, avogado do Estado ou letrado da Administración de Xustiza, alcanzan este ano cifras récord cun orzamento de 17,9 millóns de euros, preto dun 15% máis que en 2025.
Julio Abalde subliñou que esta convocatoria “supón un paso decisivo para garantir a igualdade de oportunidades no acceso ás carreiras xurídicas máis esixentes” e engadiu que “queremos que ningún talento quede fóra por razóns económicas”.
A convocatoria contempla 1.425 bolsas, un 10% máis que o pasado ano, cunha contía anual de 12.600 euros por beneficiario, 600 euros máis que o ano anterior, durante un máximo de catro anualidades. Desde a súa creación en 2022, o investimento nestas axudas incrementouse nun 1.025%, mentres que o número de bolsas medrou un 482%.
Durante o encontro, o subdelegado trasladou á decana a importancia de difundir esta oportunidade entre o alumnado da Facultade de Dereito, para facilitar que máis estudantado galego poida acceder a estas oposicións con apoio económico e formativo.
Como principal novidade desta edición, as persoas beneficiarias poderán recibir preparación presencial nas instalacións que o Centro de Estudos Xurídicos irá poñendo progresivamente á súa disposición en todo o territorio nacional. Ademais, amplíase o programa de preparación titorizada, que pasa de 100 prazas en 2025 a 300 en 2026.
Julio Abalde animou ao alumnado a informarse e presentar a súa solicitude. “Estamos ante unha oportunidade real para construír unha Administración de Xustiza máis diversa, máis aberta e con máis igualdade”.
O prazo para solicitar as bolsas permanecerá aberto ata o 7 de maio e a tramitación poderá realizarse a través da páxina web www.becassere.es.
Programa de apoio ao estudo do Goberno
No marco do apoio ao sistema educativo público de Galicia, Abalde destacou que o Goberno investiu 308 millóns de euros no sistema educativo público galego en cinco anos, dos que 200 millóns destináronse ao ensino obrigatorio e 108 millóns á Formación Profesional, permitindo crear máis de 42.000 novas prazas en ciclos formativos. Ademais, o Goberno de España realiza un investimento histórico en bolsas de 2.559 millóns de euros para o curso 2026-2027, o que supón a novena subida consecutiva desde 2018 e un incremento do 83%, o que permitirá superar por primeira vez o millón de estudantes beneficiarios en toda España.
En Galicia, 54.000 familias benefícianse actualmente destas axudas, que supoñen unha inxección económica de 132 millóns de euros, un 59% máis que hai nove anos. O importe medio das bolsas sitúase en 2.637 euros, cun incremento do 47%. Na provincia da Coruña, os datos do curso 2023-2024 reflicten que hai 8.000 persoas becadas en educación obrigatoria cunha axuda total de 6 millóns de euros, e 11.600 persoas beneficiarias en ensino postobrigatorio non universitario cunha axuda total de 22,4 millóns. No ámbito universitario, 12.000 estudantes da UDC e da USC recibiron beca ese curso, cun importe total de 34,3 millóns de euros.
Finalmente, Abalde comentou a posta en marcha das novas becas Medrano a partir do curso 2026-2027, que permitirán ao alumnado universitario cursar estudos noutras universidades españolas. “Trátase dun programa que reforza a cohesión, o intercambio académico e a igualdade de oportunidades”, explicou. Estas becas, cunha contía de 900 euros mensuais ata un total de 8.100 euros, recuperan o espírito do antigo programa Séneca e levan o nome de Luisa de Medrano, considerada a primeira profesora universitaria de España.
