O portavoz do Grupo Popular, Alberto Pazos, avanzou hoxe os asuntos que se abordarán no vindeiro Pleno do Parlamento de Galicia, unha sesión na que os populares galegos centrarán as súas iniciativas na defensa das institucións democráticas, do Estado de Dereito e dos intereses de Galicia.
Neste sentido, o Grupo Popular defenderá unha Proposición non de lei para expresar a condena do Parlamento ante os ataques dirixidos contra a Xustiza e os medios de comunicación, así como para reclamar transparencia e a depuración de responsabilidades políticas que poidan derivarse dos casos de presunta corrupción coñecidos nas últimas semanas e vinculados á contorna política e institucional do Goberno de España.
Alberto Pazos sinalou que «a confianza dos cidadáns nas institucións democráticas constitúe un dos principais activos de calquera sociedade» e advertiu da crecente preocupación social xerada por estes feitos e polo deterioro da credibilidade das institucións públicas.
«O Parlamento de Galicia debe trasladar unha mensaxe clara de defensa da independencia xudicial, da liberdade de información, da transparencia e da rendición de contas, principios esenciais para garantir o correcto funcionamento da democracia», afirmou.
A iniciativa popular insta ademais ao Goberno de España a actuar con total transparencia e plena colaboración cos órganos investigadores, así como a poñer fin a calquera utilización partidista dos medios públicos estatais.
A iniciativa popular insta ademais ao Goberno de España a actuar con total transparencia e plena colaboración cos órganos investigadores, así como a poñer fin a calquera utilización partidista dos medios públicos.
DEFENSA DA TRANSFERENCIA ÍNTEGRA DA AP-9
O Grupo Popular levará tamén ao Pleno unha iniciativa para reivindicar que a transferencia da AP-9 se materialice exactamente nos termos aprobados por unanimidade pola Cámara galega.
Pazos mostrou a súa preocupación polos cambios introducidos polos grupos que sustentan o Goberno central nun acordo que modifica radicalmente aspectos substanciais do texto consensuado por todas as forzas políticas galegas, sen contar coa Xunta de Galicia.
Os populares defenderán que Galicia asuma a xestión integral da autoestrada, incluíndo a planificación, explotación, conservación e política tarifaria, sen limitacións nin reinterpretacións posteriores. Así mesmo, consideran irrenunciable que a transferencia non supoña ningún custo adicional para os galegos e que o Estado continúe asumindo todas as obrigas económicas derivadas da concesión.
REFORMA DO REGULAMENTO DO PARLAMENTO
O primeiro punto da orde do día da próxima sesión plenaria será a Proposición de Lei de Reforma do Regulamento do Parlamento de Galicia, unha modificación puntual que conta co consenso dos catro grupos con representación na Cámara e que se tramitará por lectura única.
A reforma incorpora novos supostos para o exercicio do voto en situacións de hospitalización, incapacidade temporal ou enfermidade grave, ampliando así as garantías para que deputadas e deputados poidan exercer os seus dereitos parlamentarios.
Ademais, actualízase o réxime das preguntas orais pendentes ao remate dos períodos ordinarios de sesións, co obxectivo de dotar de maior claridade e axilidade á súa tramitación e favorecer un funcionamento máis eficaz da institución.
O pleno acollerá tamén a comparecencia do conselleiro de Educación, Ciencia, Universidades e Formación Profesional para informar sobre a evolución das políticas de investigación e innovación impulsadas pola Xunta de Galicia.
O portavoz popular destacou que a ciencia constitúe unha das prioridades desta lexislatura e lembrou a aprobación do Plan galego de investigación e innovación 2025-2027, orientado a fortalecer o sistema galego de I+D+i, impulsar a transferencia de coñecemento e reforzar a competitividade da comunidade.
Segundo indicou, o ecuador da vixencia do plan representa unha oportunidade para avaliar os avances acadados e analizar os retos pendentes para seguir consolidando Galicia como referente en investigación e innovación.
PREGUNTAS SOBRE CUESTIÓNS ESTRATÉXICAS PARA GALICIA
O Grupo Popular formulará ademais tres preguntas orais centradas en cuestións estratéxicas para Galicia.
A primeira delas abordará a recente sentenza do Tribunal Supremo sobre o parque eólico de Bustelo, que, segundo os populares, avala aspectos clave da tramitación administrativa e ambiental dos proxectos eólicos e pode contribuír a desbloquear o desenvolvemento das enerxías renovables na comunidade.
A segunda centrarase nos resultados da reunión mantida polo conselleiro de Presidencia co coordinador europeo do Corredor Atlántico, unha infraestrutura considerada fundamental para mellorar as conexións ferroviarias, reforzar a competitividade económica de Galicia e fortalecer os vínculos con Portugal e co resto de Europa.
Finalmente, o Grupo Popular preguntará polas consecuencias da aprobación polo Goberno de España do anteproxecto de Lei do Estatuto Marco do persoal sanitario. Alberto Pazos expresou a súa preocupación pola falta de consenso coas comunidades autónomas e cos profesionais médicos, así como polo impacto que esta situación está a ter sobre a asistencia sanitaria.
Neste sentido, lembrou que desde o inicio das folgas en decembro se suspenderon en Galicia preto de 245.000 actos médicos, ao tempo que destacou a capacidade de diálogo da Xunta, que acadou sete acordos con organizacións sindicais para mellorar as condicións laborais do persoal sanitario.
