O alcalde anunciou a entrada da cidade en situación de prealerta por seca ante o descenso das reservas do encoro de Eiras, que a 6 de xullo se sitúan no 86,7% da súa capacidade. O rexedor explicou que os niveis actuais son inferiores aos do mesmo período do ano pasado e mesmo peores que os rexistrados nestas datas durante a seca extrema de 2017. Segundo indicou, coas reservas actuais Vigo dispón de auga para aproximadamente cinco meses, polo que o Concello activou de inmediato o protocolo de prealerta.
Entre as primeiras medidas figura a constitución do comité municipal de seca para realizar un seguimento permanente da evolución das reservas e a posta en marcha de restricións nos usos non prioritarios da auga. O Concello suspenderá os baldeos con auga potable, reducirá os regos ao imprescindible, pechará as fontes ornamentais que non dispoñan de circuíto pechado e clausurará as duchas das praias. Ademais, non se permitirá o enchido de piscinas nin o lavado de vehículos fóra dos establecementos autorizados. Caballero fixo un chamamento á cidadanía para realizar un consumo responsable, recomendando evitar o malgasto de auga, pechar as billas cando non se utilicen e priorizar as duchas fronte aos baños.
O alcalde destacou que Vigo afronta esta situación nunha posición máis favorable grazas ás actuacións realizadas nos últimos anos para mellorar a eficiencia da rede de abastecemento. Entre elas, salientou o plan de detección e eliminación de fugas así como as humanizacións da cidade. Tamén a nova potabilizadora, unha infraestrutura financiada integramente polo Concello cun investimento de 23 millóns de euros e apoiada con fondos europeos. Segundo explicou, esta instalación permite captar auga a cotas máis baixas e incrementa nun mes a autonomía do sistema de abastecemento. “Se non fora pola potabilizadora e pola eliminación de fugas, hoxe teriamos auga só para tres meses; con estas actuacións temos garantía para cinco”, afirmou.
Caballero anunciou tamén que o Concello remitirá cartas aos municipios abastecidos polo sistema de Eiras —Soutomaior, Redondela, O Porriño, Mos, Cangas, Moaña, Gondomar e Nigrán— para solicitar que adopten tamén medidas de prealerta, xa que representan arredor do 40% do consumo do encoro.
Durante a súa comparecencia, o rexedor reclamou novamente á Xunta de Galicia comezar coa obra da nova presa augas arriba no río Oitavén, “que xa tería que estar rematada ou en construción, pero o goberno autonómico non quere facela”. Esta actuación, segundo lembrou, fora acordada entre as administracións e permitiría garantir o abastecemento mesmo nos episodios máis severos de seca. Tamén criticou que a administración autonómica continúe sen autorizar o uso de auga rexenerada procedente da depuradora para os baldeos das rúas, unha medida que, segundo indicou, permitiría manter a limpeza viaria sen consumir auga potable. “Hai concellos de toda España que xa o fan e en Vigo seguimos esperando unha autorización que levamos anos solicitando”, concluíu.
