A Comisión pola Recuperación da Memoria Histórica da Coruña (CRMH) diante das constantes trabas, incumprimentos e inacción no que ten que ver coa retirada da simboloxía franquista na cidade, convoca para mañá sábado 23 de maio as 12:00 horas, un concentración reivindicativa baixo o título “Descolguemos os retratos franquistas do Concello da Coruña”.
A lista de agravios e incumprimentos por parte do Concello da Coruña nesta materia, converten á cidade da Coruña nun caso singular no conxunto do estado Español no que ten que ver co mantemento, 50 anos após da morte do ditador Franco, dun autentico “parque temático” da simboloxía e de elementos contrarios coa memoria democrática.
A pesar de que o Consello da Memoria Democrática, convocado polas denuncias constantes da CRMH da Coruña, acordase a aplicación inmediata das recomendacións recollidas no informe realizado polo Instituto José Cornide de Estudos Coruñeses elaborado no ano 2020, este segue nun caixón sen que se iniciase por parte do concello a súa tramitación.
Moito menos a actualización de dito informe ao disposto na Lei de Memoria Democrática aprobada no ano 2022, que afectaría a moitos símbolos e elementos contrarios á memoria democrática, que non están recollidos no citado informe do ano 2020 e que o concello da Coruña ten paralizado.
Esta triste e sorprendente actitude do goberno municipal da Coruña, de claro e constante incumprimento da legalidade en materia de memoria democrática, fixo que a CRMH da Coruña acudise recentemente á fiscalía de DDHH e Memoria Democrática, e que esta incoase dilixencias preprocesais ao Concello da Coruña, requeríndolle a elaboración dun informe sobre a cuestión.
Desde a CRMH da Coruña consideramos que a retirada da simboloxía franquista non é unha cuestión exclusiva relacionada co cumprimento da legalidade (que tamén). E por riba de todo unha cuestión de compromiso cos valores dunha sociedade democrática.
É por elo que desde a Comisión pola Recuperación da Memoria Histórica da Coruña esiximos que se comece coa retirada dos retratos de golpistas e franquistas do Palacio Municipal de María Pita. Unha retirada que non precisa nin de expedientes nin de procedementos administrativos. Tan só da vontade e do compromiso democrático dun acto tan simple como é descolgar un cadro (no caso da Coruña de 18).
E niso tan simple é no que consistirá o acto reivindicativo que a CRMH da Coruña convoca este sábado na Praza de María Pita. Alí levaremos as copias dos 18 cadros de golpistas e alcaldes franquistas expostos nas diferentes estancias do concello (incluído o despacho oficial da alcaldía) e os descolgaremos simbolicamente, demostrando que é un acto de hixiene democrática fácil e sinxelo.
