A deputada de Mar e Medio Rural, Cristina Capelán, visitou a Agrupación de Protección Civil de Santa Comba para coñecer de primeira man o seu traballo e as necesidades do servizo. Estivo acompañada polo alcalde, Alberto Romar Landeira, pola tenente de alcalde, Noelia Baleato, o concelleiro de Obras, Pablo San Salvador, o xefe de Protección Civil e membros do voluntariado.
Durante a visita, Capelán comprobou os medios cos que conta a agrupación e o labor que desenvolve, clave na atención ás emerxencias, especialmente nun contexto de aumento dos episodios meteorolóxicos adversos como os vividos nos últimos meses.
A Deputación, a través das súas liñas de subvencións para agrupacións de Protección Civil, destina a este servizo máis de 11.000 euros, unha achega que permitirá mellorar o equipamento e reforzar a capacidade de resposta ante calquera incidencia, contribuíndo a incrementar a seguridade da veciñanza.
A deputada destacou a importancia de apoiar a Protección Civil, “garantindo que os concellos conten con recursos axeitados para actuar con rapidez ante calquera emerxencia”.
Capelán puxo tamén en valor o traballo do voluntariado, “fundamental para a prevención e a intervención en situacións de risco”, e agradeceu a súa implicación diaria ao servizo da cidadanía.
Esta liña de axudas forma parte da convocatoria provincial para investimentos en agrupacións de Protección Civil, dotada con 114.961,65 euros e que beneficia a 16 entidades da provincia este ano. O programa permite financiar a compra de maquinaria, ferramentas e equipamentos de rescate, mellorando a capacidade operativa destes servizos, especialmente nos concellos máis pequenos.
A esta cantidade súmanse outros 70.000 euros para financiar actividades das agrupacións de Protección Civil que se publica hoxe no BOP.
