O Proxecto Ríos, impulsado pola organización ecoloxista ADEGA, pon en marcha este mércores, 15 de abril, a súa campaña de primavera 2026, que se desenvolverá ata o vindeiro 15 de xuño cun amplo programa de actividades arredor dos ríos galegos. Durante estes dous meses, o proxecto de educación ambiental en ríos máis lonxevo do país organizará saídas formativas, accións de custodia fluvial, cursos de formación e a itinerancia dunha nova exposición co obxectivo de implicar a cidadanía na conservación dos ecosistemas fluviais.
O Proxecto Ríos é unha iniciativa de educación e voluntariado ambiental promovida por ADEGA e financiada pola Deputación da Coruña, a través da súa área de medio ambiente, e pola Confederación Hidrográfica Miño-Sil (CHMS). O programa busca dar a coñecer o papel fundamental dos ríos, sensibilizar sobre as súas problemáticas e fomentar a participación activa da sociedade na súa protección e mellora.
Entre as actividades previstas destacan as saídas formativas con centros de ensino, concellos e asociacións. Nelas, as persoas participantes percorren un treito de río mentres coñecen de maneira práctica a metodoloxía do proxecto, co fin de poder desenvolver posteriormente o programa de maneira autónoma. As primeiras saídas terán lugar mañá, 16 de abril, co CPI de Bembibre e co CPI Manuel Suarez Marquier do Rosal; e o martes 17 co IES A Paralaia de Moaña. Ademais, levaranse a cabo accións de custodia fluvial no río Sar para a eliminación da invasora Tradescantia o vindeiro sábado, 25 de abril.
Mostra «20 anos de Proxecto Ríos»
En concreto, e con motivo do seu 20 aniversario, o Proxecto Ríos estrea a exposición itinerante «20 anos de Proxecto Ríos», unha mostra composta por 11 paneis que percorren a traxectoria do programa ao longo das súas dúas décadas de vida. A través de contidos divulgativos, imaxes e exemplos de boas prácticas, a exposición pon en valor o traballo desenvolvido polo voluntariado ambiental, a evolución do proxecto e o seu impacto na conservación e coñecemento dos ecosistemas fluviais galegos.
Trátase dunha ferramenta didáctica pensada para achegar á cidadanía en xeral e ao alumnado en particular a importancia dos ríos e fomentar a implicación social na súa protección. A mostra está xa dispoñible para a súa itinerancia, polo que calquera entidade, centro de ensino ou colectivo da provincia da Coruña pode solicitar a súa instalación nos seus espazos. O primeiro lugar ao que viaxará será ao CPI de Bembibre mañá e ao IES de Ames o 29 de abril.
Todas as actividades desenvolvidas con ocasión desta efeméride enmarcanse na campaña «Súmate á corrente», que ten como obxectivo ampliar a base social do Proxecto Ríos para estudar e protexer uns ecosistemas fluviais vitais para a biodiversidade. Neste sentido, Proxecto Ríos fai un chamamento a formar parte activa deste programa de actividades.
Próximas actividades destacadas:
16 de abril: Saída formativa co CPI de Bembibre e no CPI Manuel Suarez Marquier do Rosal.
17 de abril: Saída formativa co IES A Paralaia de Moaña.
23 de abril: CPI de Pontecarreira.
25 de abril: Custodia fluvial no río Sar (eliminación de Tradescantia) e saída formativa co Censo Social Ledoñés de Culleredo.
28 de abril: Feira de Sustentabilidade no IES Luís Seoane de Pontevedra e saída formariva IES Francisco Daviña Rey (Monforte de Lemos).
29 de abril: Exposición “20 anos de Proxecto Ríos” no IES de Ames e saída formativa IES da Terra Chá, José Trapero Pardo (Castro de Ribeiras de Lea).
30 de abril: Saída formativa con COGAMI de Lugo e CEIP Rosalia de Castro (Pol).
