A deputada de Educación e Mocidade da Deputación da Coruña, Yoya Neira, visitou o Conservatorio Municipal de Culleredo xunto ao alcalde e deputado provincial, José Ramón Rioboo, nun acto no que puxeron en valor o apoio da institución provincial ao funcionamento dos centros de formación musical da provincia.
A Deputación da Coruña concedeu ao Concello de Culleredo unha subvención de 25.000 euros para o funcionamento do seu conservatorio, no marco do programa de axudas a conservatorios e escolas de música municipais, que este ano destina preto de medio millón de euros ao mantemento de 31 centros de formación musical e de danza na provincia.
Durante a visita, Yoya Neira destacou a importancia destas axudas para garantir que a formación musical chegue ao maior número posible de nenos, nenas e mozos da provincia.
O Conservatorio Municipal de Culleredo é gratuíto ao 100% para o alumnado desde o pasado curso, unha decisión adoptada polo actual goberno municipal co obxectivo de impulsar unha educación musical pública, accesible e de calidade no municipio.
Creado en 1992 por iniciativa do goberno local, o Conservatorio converteuse desde entón nun centro educativo de referencia na comarca e nun espazo fundamental para achegar a formación musical á cidadanía. Na actualidade ofrece ensinanzas de grao elemental e grao profesional, e é o único conservatorio de Galicia que imparte iniciación musical para nenos e nenas de 6 a 8 anos. Conta con 11 especialidades e uns 160 alumnos en violín, violoncello, piano, guitarra, percusión, saxofón, frauta, clarinete, trompeta, canto e acordeón.
O alcalde de Culleredo, José Ramón Rioboo, destacou que “o Conservatorio vai máis alá da formación musical: é un proxecto de educación en valores”. O rexedor sinalou que os fondos destinados á educación “son sempre un investimento, non un gasto”, e agradeceu a disposición do goberno provincial a implicarse no financiamento do centro, “en contraste coa achega nula da Xunta de Galicia, malia tratarse dunha competencia autonómica”. “É un orgullo contar cun centro propio, que forma desde idades temperás e que aborda un ámbito que é un piar social como a música”, afirmou.
Reforma do Conservatorio
Ademais do apoio ao funcionamento do centro, o Concello de Culleredo acometerá unha reforma integral do Conservatorio tras aprobar unha partida de 800.000 euros con cargo ao remanente de tesouraría. A actuación permitirá renovar o edificio e garantir o desenvolvemento da actividade docente con prestacións de calidade.
No exterior, o Concello modernizará tamén a rúa Andrés Pan Vieiro, no contorno do Conservatorio, cun proxecto cofinanciado pola Deputación da Coruña. A actuación foi licitada por 461.000 euros, dos que 250.000 euros —o 54% do investimento— proceden da institución provincial. O proxecto inclúe a creación dun espazo humanizado especial arredor do Conservatorio, con pavimento de formigón sobreelevado, novo alumeado, arborado e mobiliario urbano.
A deputada Yoya Neira incidiu en que o apoio da Deputación aos conservatorios e escolas de música municipais “forma parte dunha aposta clara pola igualdade de oportunidades no acceso á cultura e á educación, con independencia do lugar no que viva cada persoa”.
