A deputada de Vías e Obras da Deputación da Coruña, Mónica Rodríguez, mantivo un encontro co alcalde de Valdoviño, Alberto González, para coñecer in situ o estado da estrada provincial DP-5405. Na reunión participaron enxeñeiros do departamento provincial de estradas e concelleiros de Valdoviño.
O treito analizado discorre entre a AC-116, á altura da rotonda de Cantodomuro, en Meirás, e a autovía autonómica AG-64, unha vía pola que circula un volume elevado de tráfico ao constituír unha das principais conexións coa AG-64, segundo explicou o alcalde.
Durante a visita, a deputada e o equipo técnico avaliaron as características actuais da estrada e as necesidades de mellora para reforzar a seguridade viaria e a capacidade da vía. Como resultado do encontro, a Deputación e o Concello acordaron iniciar os traballos previos á redacción dun proxecto de ampliación do primeiro treito, situado na zona máis próxima a Meirás, concretamente no lugar de Riaña.
A actuación prevista terá como obxectivo o ensanche da plataforma, que pasará dos 7 metros de ancho medio actuais a un ancho de 10 metros, o que permitirá mellorar a circulación, a seguridade e a funcionalidade desta estrada provincial, de gran importancia para o municipio.
