Unha delegación de L’Isle Jourdain, a vila francesa irmandada con Carballo, visitará o noso concello do 24 ao 28 de abril para participar nun intercambio cultural que ten como obxectivo fortalecer os vínculos históricos e sociais entre ámbalas dúas localidades.
Na expedición participarán case corenta persoas de idades comprendidas entre os 11 e os 83 anos. A súa chegada a Carballo está prevista para o venres 24 ás 19.30 horas. O punto de encontro será a casa do concello, onde se lles dará a benvida formal aos visitantes antes de que sexan acollidos polas familias locais, peza clave deste programa de convivencia.
Os carballeses e as carballesas que queiran amosar a súa hospitalidade aínda están a tempo de anotarse como familias acolledoras. Se é o teu caso, envía un correo electrónico a comunicacion@carballo.gal cos teus datos e poñerémonos en contacto contigo.
Unha axenda cargada de cultura e raíz
O programa da visita destaca pola posta en común das tradicións de cada un dos concellos. O sábado 25, tras un almorzo institucional coa Escola Oficial de Idiomas (EOI) no Pazo da Cultura, o mercado municipal converterase no epicentro da xornada. Un obradoiro occitano-galego da man de Hadrián García, que dará paso a unha foliada popular na que colaboran as entidades de música tradicional do concello, ademais dunha degustación de petiscos e a tradicional queimada, será o prato forte.
O domingo 26, a delegación francesa terá a oportunidade de realizar visitas a puntos de interese de Carballo e da contorna. Como remate da fin de semana, as persoas visitantes e as súas familias de acollida están convidadas pola Concellaría de Cultura ao espectáculo Benquerer, do recoñecido bailarín e coreógrafo Fran Sieira, unha das figuras máis relevantes da danza contemporánea de raíz en Galicia.
“Este tipo de encontros non só son viaxes de lecer, senón pontes necesarias para que linguas como o occitano e o galego se recoñezan e se celebren mutuamente,” destaca a concelleira de Cultura, Maruxa Suárez, ao tempo que anima a toda a veciñanza a sumarse ás actividades previstas.
A visita concluirá o martes 28 coa marcha do grupo pola mañá, tras unha xornada de luns dedicada a actividades de libre descubrimento da zona.
