Para o presidente da Federación Galega de Municipios e Provincias (FEGAMP), Alberto Varela, «o sucedido hoxe no Parlamento de Galicia é unha vergoña que non ten precedente, e esperamos que sexa a primeira e a última vez que dende o goberno da Xunta de Galicia e dende o grupo parlamentario que o sustenta empreguen unha iniciativa parlamentaria para atacar a FEGAMP».
Ante a gravidade do escenificado na comisión do Parlamento «instamos ao conselleiro de Presidencia a que retome a institucionalidade e o respecto cara a FEGAMP e ao propio Parlamento de Galicia, e se deixe de trapalladas, impoñendo datas de reunión para que non poidamos asistir, e logo xogar con preguntas parlamentarias que deberían empregarse para fiscalizar a acción do goberno da Xunta, e non ao municipalismo galego» salientou Alberto Varela.
Para a FEGAMP, a renovación da Lei da Administración Local de Galicia (Lalga) é un asunto moi importante. Por iso, se solicitou publicamente unha reunión ao conselleiro para traballar sobre as alegacións, ao pouco tempo de telas presentadas, e vendo como o conselleiro se reunía con outras organizacións sen dar resposta á FEGAMP.
Casualmente, a resposta chegou o venres pasado pola tarde, convocando a reunión para o martes 9 ás 9:30 sen opción de cambio para garantir a asistencia, xa que xa se tiñan compromisos de axenda para ese día. Dende FEGAMP se propuxo adiala ata o martes 16 ás 9:30 horas. A resposta foi que se delegara a representación en outras persoas ou que se conectaran por videoconferencia. Dende a FEGAMP agardemos poder manter a reunión o máis cedo posible, nunha data consensuada.
A hemeroteca lembra que o pasado 6 de marzo xa confirmouse publicamente que a Comisión Executiva da FEGAMP, elixida democraticamente na asemblea de 2023, abordou as alegacións á este anteproxecto na súa reunión extraordinaria celebrada o 3 de marzo a partires dos traballos elaborados polo persoal técnico da federación municipalista, acordándose, sen obxección algunha que, de non haber cuestións sobre os contidos do informe e das alegacións que precisaran ser resolvidas, se rexistrarían antes do remate do prazo fixado pola Xunta de Galicia o 5 de marzo.
«Non parece lóxico que a organización da que forman parte os trescentos trece concellos e as catro deputacións galegas só poda intervir nos traballos iniciais da futura nova Lalga rexistrando alegacións, como calquera particular» destacou o presidente da FEGAMP, reforzando a importancia desta lei «para os concellos e as deputacións, que merece un espazo destacado para que o municipalismo galego e a Xunta de Galicia dialoguen e avancen en consensos que se incorporen ao anteproxecto antes da súa tramitación parlamentaria».
«Despois do ataque recibido esta mañá no Parlamento, sen posibilidade de resposta nin réplica por parte da FEGAMP e de ningún outro grupo parlamentario, nos vemos na obriga de solicitar a nosa comparecencia na mesma comisión do Parlamento de Galicia para achegar o balance do municipalismo galego sobre as políticas da Xunta de Galicia dirixidas aos concellos e as propostas que temos elaboradas tanto para a futura nova Lalga como para o resto das políticas públicas que afectan aos concellos» anunciou Alberto Varela.
O sucedido nestes días tamén merece as valoracións do vicepresidente segundo da FEGAMP, Secundino García, quen denunciou que dende a Consellería de Presidencia «están facendo un uso espúreo das institucións, nas que deberían dedicarse a gobernar, e non a utilizalas para defender os seus intereses partidistas. A directora xeral de Administración Local foi ao Parlamento á petición do PP para atacar á FEGAMP, abusando da súa maioría absoluta e como saben que a van aprobar igual, xa nin respectan os tempos nin o diálogo que se pediu dende a FEGAMP».
Tamén a vicepresidenta executiva da FEGAMP, María Barral, valorou a situación creada dende a Consellería confirmando que «buscan a confrontación, convocándonos con moi pouco tempo de antelación á unha xuntanza que saben que non podemos asistir, precisamente para que non asistamos, e ao mesmo tempo teñen preparada co grupo parlamentario popular unha pregunta no Parlamento de Galicia na que se critica e ataca á FEGAMP, e que non pode recibir intervencións de ningún outro grupo».
