A Comisión Executiva da Federación Galega de Municipios e Provincias (FEGAMP) aprobou na súa última reunión a declaración institucional en conmemoración do Día das Letras Galegas 2026, que, como cada ano, se celebrará o vindeiro 17 de Maio, e que este ano homenaxea á xornalista e escritora Begoña Caamaño.
A FEGAMP comparte este recoñecemento público “a unha persoa cunha clara influencia local, moi vinculada as súas dúas cidades vitais: Vigo e Santiago de Compostela”, nas que desenvolveu o seu labor profesional e literario.
Na declaración aprobada sinálase que Begoña Caamaño comezou en Vigo “a súa traxectoria profesional como xornalista, deixando unha pegada indeleble desde os seus inicios en Radio Popular e Radio do Noroeste, ata a súa definitiva incorporación á Radio Galega en 1989”.
Despois, en 1993 e dende Santiago de Compostela “ proseguiu o seu labor na Radio Galega ata 2012, sendo unha gran defensora dos medios públicos galegos e do súa función de proporcionar á cidadanía información e contidos precisos para poder decidir con liberdade e responsabilidade”, sinala a declaración.
O labor innovador nas súas novelas, «Circe ou o pracer do azul» (2009) e «Morgana en Esmelle» (2012), que foron pioneiras na reinterpretación feminista dos mitos, tamén é destacado pola FEGAMP, que lembra que “Begoña Caamaño convértese na sétima muller á que se lle adica o Día das Letras Galegas, despois de Rosalía de Castro, Francisca Herrera Garrido, María Mariño, María Vitoria Moreno, Xela Arias e Luísa Villalta”.
Na declaración, a FEGAMP sinala o “protagonismo decisivo do municipalismo galego na reivindicación do galego e na defensa da súa extensión social”, como na “Declaración do Hostal dos Reis Católicos”, subscrita en 1984, en Santiago de Compostela, por 184 alcaldías de todas as tendencias políticas e de todos os puntos da xeografía galega, na que “defendían a implantación do galego nas administracións públicas en Galicia, tanto no seu uso, como no seu coñecemento para o acceso ao emprego público”.
A FEGAMP remata a declaración salientando que coa súa conmemoración do Día das Letras Galegas “atende o seu obxectivo de promover a cultura e a lingua galega no marco das competencias que o ordenamento xurídico lles atribúe ás corporacións locais de Galicia”, e lembra que “segue a defender a vixencia e a extensión do galego e potenciando a súa presencia nas novas canles derivadas do desenvolvemento das novas tecnoloxías da información e da comunicación.
