O presidente da Xunta, Alfonso Rueda, indicou hoxe que a proposta da oferta de emprego público (OEP) da Administración xeral da Xunta e das entidades instrumentais do sector público autonómico para este ano 2026 ascende a “máis de 1.200 prazas, case o 70% de acceso libre” e negociarase coas organizacións sindicais esta mesma semana.
Na elaboración desta proposta, o Goberno galego aplicou a “taxa máxima de reposición permitida polo Estado, que é a establecida no ano 2023, xa que son os últimos PGE aprobados”, tal e como indicou Rueda. A proposta, explicou, inclúe “811 prazas de acceso libre e 300 de promoción interna independente do persoal funcionario de carreira, ademais de 91 prazas para promoción interna de persoal laboral fixo como proceso de funcionarización”.
Así quedou patente nun informe que coñeceu hoxe o Consello de Goberno, en que a Consellería de Facenda e Administración Pública debullou a proposta que se debaterá nos vindeiros días.
Con esta proposta, o Goberno galego garante a posibilidade de que calquera persoa que cumpra os requisitos poida acceder a un emprego fixo, estable e de calidade na Administración autonómica, así como o dereito do persoal empregado público a unha promoción profesional.
Prazas de acceso libre
Do total das 811 prazas de acceso libre, “máis de 370 serán para os principais corpos e escalas da Administración xeral, máis de 330 prazas son para escalas da Administración especial e máis de 90 prazas son para categorías de persoal laboral”, indicou Rueda.
A todas estas prazas poderá acceder calquera persoa que cumpra os requisitos exixidos nas correspondentes convocatorias.
Por outra parte, a oferta inclúe máis de 50 prazas de acceso libre en entidades do sector público instrumental autonómico.
Promoción interna
Ás prazas de acceso libre súmanse outras 300 prazas para a promoción interna do persoal funcionario de carreira, uns procesos reservados a empregados e empregadas públicas que xa son persoal funcionario e que poden acadar un ascenso ou promoción profesional a postos de traballo de maior responsabilidade e retribución.
Así mesmo, ofértanse 91 prazas de promoción interna para persoal laboral fixo como proceso de funcionarización.
Prazas reservadas para persoas con discapacidade
O presidente da Xunta explicou que “do total das prazas desta OEP, resérvase un 12% para persoas con discapacidade” e unha parte delas será para o acceso de persoas que acrediten discapacidade intelectual.
Rueda salientou que esta reserva é “cinco puntos por riba do mínimo que marca a lexislación”, que establece un mínimo do 7 % para facilitar o acceso da discapacidade á función pública, de xeito que progresivamente se alcance o 2 % dos efectivos totais de cada Administración pública incluída no ámbito de aplicación desta lei, porcentaxe que, por outra parte, xa está superada no caso da Administración xeral. Continúase así cunha medida que ten como obxectivo colaborar na integración social e laboral das persoas con discapacidade.
