A futura Rolda Leste vai permitir “retirar tráfico de Ourense, de sitios céntricos que non teñen que soportar esa carga” e “facer conexións moi importantes” en menos tempo, facilitando os desprazamentos. Así o sinalou nun acto en Ourense no que estivo acompañado pola conselleira de Vivenda e Planificación de Infraestruturas, María Martínez Allegue, con motivo da licitación esta mesma mañá do último tramo que falta por construír desta infraestrutura.
Tal e como anunciou o presidente da Xunta, as empresas terán ata setembro —en concreto, ata o día 7— para presentar as súas ofertas, e o obxectivo é adxudicar as obras “antes de que remate este ano”. Despois, haberá 30 meses para a execución dunha “obra complexa”, poñendo en valor que, a pesar de levarse a cabo nunha zona urbana, “non se leva por diante ningunha casa”.
O novo treito, no que se investirán 12,7 millóns de euros, terá unha lonxitude de 1,5 quilómetros nos concellos de Ourense e San Cibrao das VIñas e virá a completar a conexión desde Bemposta ata a N-525. Desta forma, ofrecerá unha saída máis directa cara a zona sur da cidade, os polígonos industriais e a autovía das Rías Baixas. Polo tanto, a conexión terá un alcance metropolitano e provincial, xa que enlaza varias das vías máis utilizadas da contorna de Ourense.
Rueda explicou que esta actuación se enmarca no esforzo que está facendo a Xunta por mellorar as infraestruturas viarias da provincia de Ourense, nas que está investindo máis de 35 millóns de euros. Así, ademais da Rolda Leste, citou outros traballos como os que se están acometendo na OU-540, entre Celanova e Bande, xa en obras; na OU-533 entre A Gudiña e Viana do Bolo, en información pública; ou na senda peonil na OU-402, en Reza, no concello de Ourense, tamén en obras. O presidente autonómico, quen sinalou que “hai que seguir investindo”, remarcou que “se temos colaboración das outras administracións, todo é máis sinxelo, e todo é moito máis rápido”.
Este tipo de traballos nas infraestruturas viarias obedecen a unha dobre aposta: por un lado, manter en bo estado a rede de estradas autonómicas, un eido no que o Goberno galego está investindo 54 millóns de euros neste ámbito; e por outro lado, poñer en marcha novas conexións, como esta Rolda Leste, para facilitar a vida da xente, mellorar a mobilidade e aumentar a seguridade viaria. Así, a Administración autonómica está destinando 170 millóns de euros a construír novas vías de altas prestacións.
