As Letras Galegas de 2026 queren saír á rúa, respirar ao ritmo da música, da creación contemporánea e das librarías cheas de xente buscando historias. Queren afastarse da solemnidade inmóbil para reivindicar algo moito máis poderoso: que ler en galego tamén é un acto de pracer, de identidade e de rebeldía feliz. Con esa intención nace “Rebélate: compra un libro!”, a nova campaña promovida conxuntamente pola Federación de Librarías de Galicia e a Asociación Galega de Editoras con motivo do Día das Letras Galegas.
Inspirada na figura homenaxeada este ano, a escritora e xornalista Begoña Caamaño, a campaña constrúe unha mensaxe clara: a lectura na nosa lingua non é unha obriga nin unha nostalxia, senón unha forma de liberdade contemporánea. Unha maneira de comprender o mundo, de emocionarse, de cuestionar e de gozar. Porque, como defendía a propia autora, “a alegría, o gozo, a risa, a felicidade son discurso político”.
A proposta visual e conceptual da campaña afástase deliberadamente da estética clásica asociada ás Letras Galegas para apostar por unha imaxe vibrante, moderna e urbana, influenciada pola cartelería musical, os fanzines e a gráfica contemporánea. O obxectivo: converter o libro galego nun símbolo de actitude, nun obxecto de desexo cultural, nun pequeno xesto de insubmisión feliz.
A rebelión da comunidade lectora: reivindicación e festa
Baixo o lema “Rebélate: compra un libro!”, a iniciativa vense desenvolvendo dende hai uns días nas redes sociais, e busca reivindicar as sinerxias culturais dentro da comunidade lectora en galego, por iso a campaña conta con recomendacións literarias desde librarías galegas, colaboracións con artistas musicais e contidos dirixidos a públicos diversos, desde a mocidade ata as familias e as persoas maiores.
A campaña contará tamén coa participación de creadoras e grupos musicais galegos como Fillas de Cassandra ou The Rapants, ademais de diferentes librarías de proximidade que recomendarán lecturas e reivindicarán o seu papel como auténticos pulmóns culturais do país.
O punto culminante chegará o propio 17 de maio, Día das Letras Galegas, cando as librarías participantes ofrecerán un 10% de desconto en todos os libros en galego, convertendo a xornada nunha gran celebración colectiva arredor da lectura e da cultura propia. Un convite a encher as casas de historias, pensamento e voces galegas.
Con esta campaña, editoras e librarías queren reivindicar non só a importancia do libro galego como motor cultural e económico, senón tamén a necesidade de construír un relato novo arredor da nosa lingua: máis luminoso, máis libre, máis contemporáneo e profundamente vivo. Porque ler en galego non é mirar cara atrás. É, precisamente, unha maneira de avanzar.
