O deputado do BNG no Congreso, Néstor Rego, denuncia os graves problemas que están a afectar á realización de trámites telemáticos na sede electrónica do Servizo Público de Emprego Estatal (SEPE). Para o deputado nacionalista esta situación, que cualifica de “inaceptábel”, está a prexudicar directamente ás persoas usuarias e urxe o Goberno solucións inmediatas.
Segundo fixeron público as propias traballadoras e traballadores do organismo, o SEPE estabeleceu un horario restrinxido para a realización de trámites online, limitado de 8:00 a 20:00 horas. Esta medida impide realizar xestións fóra dese horario, como solicitudes de prestacións, prórrogas de subsidios ou declaracións anuais de rendas. O deputado do BNG considera “absurda” esta limitación, xa que precisamente unha das principais vantaxes da administración electrónica é permitir o acceso continuo, as 24 horas do día.
Néstor Rego critica que o Goberno xustifique esta situación como unha incidencia temporal derivada da modernización do sistema informático, cando en realidade “leva meses prolongándose sen solución efectiva”. Neste sentido, reclama a recuperación inmediata do funcionamento continuado da sede electrónica.
Ademais, o BNG volve poñer o foco nos problemas derivados da implantación do sistema informático ALMA, que está a provocar fallos constantes, interrupcións nos trámites e dificultades para garantir conexións seguras. “Tal e como advertimos no seu momento, esta ferramenta non está a mellorar o servizo, senón que está a provocar máis atrasos e complicacións na tramitación dos expedientes” sinala Rego.
A formación nacionalista tamén alerta da grave falta de persoal no SEPE na Galiza. Nos últimos catro anos perdéronse arredor de 85 empregadas e empregados públicos, aos que hai que sumar 155 postos vacantes, o que supón unha redución significativa dos efectivos dispoñíbeis. Esta situación, denuncia o BNG, está a impedir prestar unha atención adecuada á cidadanía.
A pesar de que o Ministerio asegurou no pasado o seu compromiso co reforzo do servizo presencial e anunciou a incorporación de novo persoal a nivel estatal, o BNG critica a falta de concreción sobre o impacto destas medidas na Galiza.
Diante desta situación, Néstor Rego exixe a eliminación inmediata das limitacións horarias na sede electrónica do SEPE e a recuperación do acceso continuo aos trámites online, así como resolver os problemas técnicos asociados ao sistema ALMA co obxectivo de garantir a súa fiabilidade e un funcionamento correcto.
“Urxe reforzar o cadro de persoal nas oficinas do SEPE na Galiza, cubrindo as vacantes existentes e incrementando os efectivos para responder á demanda actual, así como realizar unha análise exhaustiva dos fallos do sistema informático e a posta en marcha de solucións eficaces no menor tempo posíbel” engade o deputado do BNG.
