O alcalde de Ferrol, José Manuel Rey Varela, e o Almirante Xefe do Arsenal Militar de Ferrol, Vicente Rubio Bolívar, presentaron esta mañá no pazo municipal a xura de bandeira para persoal civil que a Armada organiza, en colaboración co Concello, con motivo do 300 aniversario de Ferrol como Departamento Marítimo.
A praza de Armas é o escenario elixido para un acto “de fonda carga simbólica e emocional”, tal e como expresou o alcalde, no que os cidadáns poderán expresar publicamente o seu compromiso coa nación. O acto celebrarase o 20 de xuño ás 12:00 horas e aquelas persoas que desexen participar poderán inscribirse na Oficina Delegada de Defensa en Ferrol (rúa Cuntis 26, baixo) ou descargar a solicitude a través deste enlace.
Cómpre destacar que se habilitarán zonas para que a cidadanía poida desfrutar deste evento único no que, quen o desexe, poderá “representar o seu vínculo cos valores constitucionais e coa propia nación española”, declarou o Almirante.
Esta cita enmárcase no 300 aniversario da cidade, cando “hai tres séculos, no ano 1726, a decisión de establecer aquí un dos principais departamentos marítimos da Coroa marcou para sempre o destino desta cidade e, a partir dese momento, Ferrol deixou de ser só un enclave costeiro para converterse nun dos grandes centros estratéxicos e navais de España”, rememorou o alcalde. “As infraestruturas militares e civís non só transformaron a paisaxe urbana, senón tamén a alma desta cidade e a Armada desempeñou, e segue a facelo, un papel fundamental nesta historia, como motor económico e social”, engadiu.
Neste contexto, “queremos celebrar este aniversario, que é moito máis que unha efeméride histórica, con toda a cidadanía”, manifestou Rey Varela. Trátase dunha “oportunidade para mirar atrás con orgullo e, ao mesmo tempo, saudar a un futuro que xa está aquí e no que Ferrol seguirá sendo referencia naval e militar”.
Así mesmo, o alcalde agradeceu á Armada por poñer en marcha esta iniciativa e polo seu “compromiso continuo” con Ferrol, que queda patente co seu respaldo aos grandes proxectos de cidade. Un agradecemento que fixo extensivo ao Almirante Xefe, cuxa implicación e apoio resultan fundamentais para facer posible unha celebración desta envergadura.
Pola súa banda, o Almirante agradeceu ao alcalde e ao Concello de Ferrol a “magnífica oportunidade que nos ofrecéchedes para realizar esta xura fóra das instalacións militares e no marco incomparable da praza de Armas, o corazón da cidade”. Trátase dun “acto militar, solemne que permite aos cidadáns expresar a súa fidelidade e lealdade a España a través do maior signo da nación que é a bandeira, polo que animo a toda a cidadanía a participar neste acto”, engadiu. Para elo, lembrou que o prazo de inscrición permanecerá aberto ata o 10 de xuño e que haberá un cupo máximo de 250 xurandos, cifra que pode ser susceptible de ampliación en caso de que a demanda así o requira.
