A Semana Santa Ferrolá contará este ano con tramos silenciosos; unha iniciativa pioneira en Galicia. Ferrol é a única cidade galega que consensuou con Autismo Galicia e a Junta General de Cofradías y Hermadades de la Semana Santa Ferrolana medidas inclusivas como son os tramos silenciosos e os mapas con planos adaptados e pictogramas para que todo o mundo poida disfrutar das procesións,
A concellería de Política Social, ao frente da que se atopa Rosa Martínez, foi a encargada de levar a cabo esta xestión para a instalación das lonas en distintos tramos do percorrido, co obxectivo de sinalizar os espazos nos que o desfile transcorrerá sen música, nin ruído. As persoas con TEA adoitan presentar hipersensibilidade auditiva, polo que sons habituais poden resultarlles molestos, incluso dolorosos, e chegar a xerarlles altos niveis de ansiedade.
- Únete á nosa canle de Whatsapp para recibir notificacións de interese
Neste contexto, a edila subliñou que esta iniciativa busca que “todas as persoas poidan vivir e desfrutar a Semana Santa dunha maneira tranquila”, ao tempo que destacou que “se trata dunha medida de accesibilidade cognitiva que contribúe a mellorar a inclusión e a participación de toda a cidadanía na vida social da cidade”. Martínez agradeceu a colaboración de Autismo Galicia, que representa a 16 entidades na nosa comunidade, nesta iniciativa que poderemos ver a partir de mañá.
Así os tramos silenciosos son os seguintes: o mércores na procesión Procesión da Nosa Señora dos Cativos e do Santísimo Cristo Redentor da Confraría da Mercé o tramo silencioso estará na rúa Terra entre Magdalena e Real; o xoves na Procesión do Noso Pai Xesús da Humildade no bico de Xudas da Confraría da Mercé na rúa Concepción Arenal entre Magdalena e Real.
O venres na Procesión do Crucificado da Confraría da Mercé sinalizarase núa Coruña entre Magdalena e Real; na Procesión do Santo Enterro na rúa Rubalcaba entre a Magdalena e Real; na Procesión da Virxe da Soidade da Confraría da Soidade na rúa Magdalena entre Arce e San Diego e na procesión dos Caladiños da Confraría de Dolores na rúa Rubalcaba entre Magdalena e Real. O sábado na procesión da Caridade e o Silencio da Confraría das Angustias na rúa Sánchez Barcaiztegui entre Real e Magdalena.
ZONAS HABILITADAS PARA PERSOAS CON MOBILIDADE REDUCIDA
Ademais, dende a concellería de Mobilidade e Seguridade, que dirixe Pamen Pieltain, en coordinación coa ASCM habilitouse un espazo, na rúa Méndez Núñez con Real, para que a xente con mobilidade reducida poida seguir tamén os desfiles procesionais. E, ademais, delimitarase un espazo na praza de Armas para as procesións do Santo Encontro, o venres, e o do Gozoso Encontro, o domingo de Resurrección.
