O subdelegado do Goberno na Coruña, Julio Abalde, informou hoxe nunha visita á papelería Carlin, onde foi recibido polo seu xerente, Humberto Corona, das novas axudas promovidas polo Goberno para facilitar a adquisición de libros de texto e material didáctico, así como do reforzo do sistema de becas de cara ao curso 2026-2027. Abalde destacou o compromiso do Goberno de Pedro Sánchez co apoio ás familias galegas e co ensino público.
Abalde explicou que o Consello de Ministros do pasado 10 de marzo aprobou a proposta de reparto territorial do Programa de Cooperación Territorial para o financiamento de libros de texto, dotado con 58,5 millóns de euros a nivel estatal. Deste total, Galicia recibirá 2.416.420 euros, que serán transferidos á Xunta permitindo que a Consellería de Educación financie axudas para alumnado de Primaria, ESO, Bacharelato e Formación Profesional en centros sostidos con fondos públicos.
“O Goberno segue a garantir que ningunha situación económica limite o acceso á educación. Por iso, reforzamos ano a ano as axudas para que ningún neno ou nena, ningún mozo ou moza, teña que renunciar a estudar por falta de recursos. O noso compromiso é claro: apoiar ás familias e acompañar ás persoas en todas as etapas educativas, asegurando igualdade real de oportunidades”, destacou Julio Abalde. Estes fondos permitirán financiar material para alumnado de ensino non universitario en centros sostidos con fondos públicos, incluíndo soportes dixitais.
O subdelegado lembrou que, nos últimos cinco anos, o Ministerio de Educación xa destinou 13,5 millóns de euros a Galicia neste programa, cifra que ascende a 15,9 millóns cos novos fondos. Ademais, incidiu en que, segundo o INE, as familias galegas destinan preto de 400 euros por neno a material escolar, polo que estas medidas supoñen un alivio económico importante.
No marco do apoio ao sistema educativo público de Galicia, Abalde destacou que o Goberno investiu 308 millóns de euros no sistema educativo público galego en cinco anos, dos que 200 millóns destináronse ao ensino obrigatorio e 108 millóns á Formación Profesional, permitindo crear máis de 42.000 novas prazas en ciclos formativos.
Ademais, o Goberno de España aprobou tamén un investimento histórico en becas de 2.559 millóns de euros para o curso 2026-2027, o que supón a novena subida consecutiva desde 2018 e un incremento do 83%, o que permitirá superar por primeira vez o millón de estudantes beneficiarios en toda España.
Entre as novidades, destacou a posibilidade de solicitar beca para alumnado con matrícula parcial e a actualización dos límites de patrimonio nunha media do 10%, medidas que favorecen especialmente a quen máis o necesita.
En Galicia, 54.000 familias benefícianse actualmente destas axudas, que supoñen unha inxección económica de 132 millóns de euros, un 59% máis que hai nove anos. O importe medio das becas sitúase en 2.637 euros, cun incremento do 47%.
Na provincia da Coruña, os datos do curso 2023-2024 reflicten 8.000 persoas becadas en educación obrigatoria cunha axuda total de 6 millóns de euros, e 11.600 persoas beneficiarias en ensino postobrigatorio non universitario cunha axuda total de 22,4 millóns.
No ámbito universitario, 12.000 estudantes da UDC e da USC recibiron beca ese curso, cun importe total de 34,3 millóns de euros.
Finalmente, Abalde anunciou a posta en marcha das novas becas Medrano a partir do curso 2026-2027, que permitirán ao alumnado cursar estudos noutras universidades españolas. “Trátase dun programa que reforza a cohesión, o intercambio académico e a igualdade de oportunidades”, explicou. Estas becas, cunha contía de 900 euros mensuais ata un total de 8.100 euros, recuperan o espírito do antigo programa Séneca e levan o nome de Luisa de Medrano, considerada a primeira profesora universitaria de España.
