O Concello de Lugo avanza na planificación para a reordenación do tráfico e da mobilidade no entorno da avenida de Ramón Ferreiro, unha das principais arterias viarias da cidade e un dos ámbitos con maior intensidade de circulación.
A actuación responde á necesidade de mellorar de forma global o funcionamento da rede viaria nesta zona, actuando sobre os puntos de maior complexidade, mellorando a seguridade dos itinerarios peonís e buscando unha distribución máis eficiente do tráfico e do espazo público.
O ámbito de actuación comprende as avenidas de Ramón Ferreiro e Rodríguez Mourelo, así como as rúas Alcalde Anxo López Pérez, Salvador de Madariaga, Dinán, Senador Xacinto Calvo, Galicia, Celso Emilio Ferreiro e a Praza da Bretaña, entre outras vías da contorna.
Entre as principais actuacións previstas destacan:
Unha rotonda física para ordenar unha intersección que hoxe non funciona correctamente. Na actualidade, o cruzamento entre as avenidas Ramón Ferreiro e Rodríguez Mourelo coas rúas Vilalba e Alcalde Anxo López Pérez conta cunha rotonda debuxada sobre a calzada, pero esta solución non está a garantir que todos os vehículos respecten os movementos establecidos. Por iso, a planificación municipal contempla substituíla por unha glorieta física, que obrigue a ordenar os percorridos, mellore a fluidez e incremente a seguridade na intersección. A actuación completarase con medidas para reforzar a seguridade peonil, como o sobreancho da beirarrúa entre Vilalba e Bispo Aguirre e o retranqueo do paso de peóns en Rodríguez Mourelo.
Mellora das interseccións con maior complexidade. A reordenación permitirá actuar sobre os cruzamentos de Ramón Ferreiro con Celso Emilio Ferreiro e Pintor Corredoira, así como sobre a intersección entre Senador Xacinto Calvo, Celso Emilio Ferreiro e Galicia, buscando reducir os conflitos nos xiros e mellorar os percorridos peonís.
Nova configuración dos sentidos de circulación. A rúa Celso Emilio Ferreiro pasará a contar con dobre sentido de circulación, ao igual que un treito da Praza da Bretaña, entre Dinán e Senador Xacinto Calvo. Esta modificación permitirá mellorar a mobilidade na zona e dará resposta ás necesidades de funcionamento e capacidade de resposta dos vehículos da Garda Civil.
Mellora da carga e descarga. Tamén se reorganizarán algunhas das zonas destinadas a estas operacións, co traslado da parada situada na marxe esquerda da avenida Alcalde Anxo López Pérez á marxe dereita e a reubicación da zona de carga e descarga de Celso Emilio Ferreiro na propia avenida Ramón Ferreiro.
Análise de novas posibilidades de estacionamento. Dentro da planificación tamén se estudarán alternativas que permitan incrementar o número de prazas de estacionamento na contorna de Ramón Ferreiro, concretamente nos ámbitos comprendidos entre Pintor Corredoira e Fonte do Rei e á altura da Praza Horta do Seminario, así como na zona da rúa Cidade de Vigo e da Praza da Constitución.
Mellora dos itinerarios peonís e da sinalización. A actuación contempla tamén melloras arredor do paseo central da mediana de Ramón Ferreiro, co obxectivo de garantir percorridos peonís máis seguros e continuos, xunto coa renovación da sinalización horizontal e vertical.
Unha actuación integrada na planificación da mobilidade
O concelleiro de Mobilidade e Obras, Antonio Ameijide, salienta que esta actuación responde á vontade do Goberno municipal de abordar a mobilidade desde unha perspectiva global e planificada, actuando sobre os distintos elementos que condicionan a circulación nesta contorna.
“Ramón Ferreiro é unha das principais vías de entrada e saída da cidade e concentra unha parte importante da circulación. Por iso, estamos a traballar nunha reordenación global que permita mellorar os cruzamentos, facilitar os desprazamentos dos peóns, optimizar os sentidos de circulación e buscar novas alternativas de estacionamento”.
Ameijide destaca que o obxectivo é anticiparse ás necesidades da cidade e ordenar os distintos usos do espazo público, combinando a mellora da circulación coa seguridade peonil e coas necesidades dos residentes, dos servizos públicos e da actividade da zona.
A planificación municipal permitirá así actuar de maneira coordinada sobre un dos principais eixes de mobilidade de Lugo, buscando unha solución de conxunto fronte ás distintas necesidades detectadas nesta contorna.
