A gran cita final terá lugar este sábado 13 de xuño na contorna de Frigsa e prevé reunir a preto de 900 atletas na liña de saída.
O evento, consolidado como o único circuíto gratuíto de Galicia, contará cunha exposición de vehículos e medios operativos do Exército, Policía, Garda Civil e Bombeiros.
A Concellería de Deportes de Lugo lembra que haberá cortes e reordenación do tráfico na Avenida Duquesa de Lugo desde as 18:30 horas.
O Concello de Lugo prepárase para vivir este sábado, 13 de xuño, o gran broche de ouro do XXIV Circuíto Larsa Corre con Nós. Este emblemático circuíto de carreiras populares despide a súa edición de 2026 cunha cifra histórica: un récord absoluto de 2.600 participantes inscritos ao longo de todo o circuíto, dos cales se espera que entre 800 y 900 atletas compitan nesta última proba na contorna do Parque de Frigsa.
Ao igual que na pasada edición, nesta cita final renderase homenaxe ás Forzas Armadas e Corpos de Seguridade. O evento contará coa implicación activa e operativa de membros do Exército de Terra, o Exército do Aire e do Espazo, a Armada, a Policía Nacional, a Policía Autonómica, a Garda Civil, a Policía Local e os Bombeiros de Lugo.
Exposición de medios e saída no Auditorio Gustavo Freire
Máis alá da competición pura, a xornada terá un forte compoñente lúdico e divulgativo. O aparcadoiro do Auditorio Gustavo Freire (novo punto de saída e meta da proba) acollerá unha mostra de vehículos e infraestrutura operativa destes corpos de seguridade e defensa. Tanto os corredores como o público xeral poderán achegarse para coñecer de preto o seu labor diario de protección e servizo á cidadanía.
O Circuíto Larsa Corre con Nós, que o vindeiro ano celebrará as súas vodas de prata (25 anos), consólidase grazas ao impulso da Concellería de Deportes como o único circuíto de carreiras populares totalmente gratuíto de Galicia, sumando 24 anos ininterrompidos de compromiso co deporte base e a saúde. Este éxito é posible tamén grazas ao patrocinio de Larsa, e á colaboración de Caixa Rural Galega, Coca-Cola e o Centro Comercial As Termas.
Horarios e Percorridos das Carreiras
As probas arrincarán a partir das 19:00 horas en función das distintas categorías:
- 19:00 h – Categoría Mini (250 metros)
- 19:05 h – Sub10 e Sub12 (850 metros)
- 19:15 h – Sub14 e Sub16 (1.700 metros)
- 19:30 h – Categoría Adultos (4.750 metros) — Coa participación activa dos membros dos corpos de seguridade e do exército, que terá unha clasificación particular con entrega de premios ao finalizar a proba
Consulta de mapas e percorridos en tempo real: https://racemapp.com/proyecto/481-corre-con-nos-frigsa-final-circuito
Afectación ao tráfico e cambios de localización
A organización lembra que a zona loxística se despraza ao Auditorio Gustavo Freire. Con motivo do desenvolvemento da carreira, o tráfico na Avenida Duquesa de Lugo (no tramo paralelo ao Parque de Frigsa) sufrirá as seguintes modificacións entre as 18:30 h e as 20:30 h:
- Marxe dereita (sentido O Ceao): Dividirase mediante conos para permitir a circulación de vehículos en ambos os dous sentidos
- Marxe esquerda: Permanecerá totalmente cortada ao tráfico para garantir a seguridade dos corredores durante a proba de adultos
Entrega de Trofeos Finais
Respecto á entrega de premios da clasificación xeral do circuíto 2026 (categorías menores, adultos, clasificación xeral, por equipos, colexios e familias), a organización anunciará proximamente a data, lugar e hora do acto, comunicándoo individualmente a cada un dos galardoados a través de correo electrónico.
Máis información e clasificacións en: https://correconnos.com/es/web/evento/3167/
