A actuación supera os 3 millóns de euros de investimento, dos que máis de 2 millóns son financiados polo Goberno de España a través de fondos europeos.
O proxecto inclúe unha humanización integral da contorna, con beirarrúas máis amplas, novas zonas verdes, renovación das redes de saneamento, abastecemento e pluviais, así como a modernización das canalizacións de servizos. Caballero definiu a intervención como unha “humanización de alto standing”.
O alcalde destacou que esta actuación forma parte dun gran itinerario peonil e mecánico que conecta diferentes zonas do centro urbano. O corredor arranca na contorna de Carral, actualmente en proceso de remodelación, continúa polas escaleiras mecánicas que unen a Porta do Sol coa parte baixa do Paseo de Granada, enlaza coas novas ramplas e prolongarase nunha seguinte fase con outra rampla mecánica adicional.
Segundo explicou Caballero, esta infraestrutura permitirá conectar tamén coa Praza do Bicentenario e co transporte público urbano. “É como se o autobús estivese na Colexiata, porque todo o sistema mecánico permite chegar ata aquí de forma rápida e cómoda”, afirmou.
O rexedor avanzou que a inauguración do novo corredor está prevista para finais deste mes e amosou a súa satisfacción polo avance das obras. Ademais, reafirmou o compromiso municipal de seguir ampliando a rede de mobilidade mecánica da cidade. “Seguiremos facendo humanizacións e novas ramplas mecánicas”, asegurou Caballero, quen lembrou que nos próximos meses comezarán tamén as actuacións previstas na Gran Vía para conectar a Praza de América coa Praza de España.
