A concelleira de Turismo, Maica García, presentou hoxe a guía turística de verán da cidade, da que se editan 3.000 exemplares en galego, castelán e inglés que se poden recoller nas oficinas de turismo e tamén na casa consistorial. Ademais, pode consultarse na páxina web do Concello de Ferrol.
A publicación reúne a programación de actividades, visitas guiadas e propostas de lecer que se desenvolverán ata principios de setembro. “Nesta guía recollemos as principais actividades lúdicas e de ocio das que poderán gozar todas as persoas que nos visiten durante estes meses”, sinalou.
A programación arranca hoxe, 16 de xullo, co inicio das visitas guiadas de Ferrol Secreto, que se celebrarán os xoves e os sábados. A partir do 18 de xullo e ata o 13 de setembro retomaranse as visitas ao Arsenal Militar e ás súas instalacións do século XVIII, incluíndo a Sala de Armas, a Batería da Cortina, a dársena e o dique da Campá. Tamén se manterán as visitas ao estaleiro de Navantia e ao castelo de San Felipe.
Desde mañá, 17 de xullo, e ata o 19 de setembro, desenvolveranse as visitas guiadas ao Ferrol modernista, un percorrido para descubrir a obra do arquitecto ferrolán Rodolfo Ucha e o legado do modernismo na cidade. Pola súa banda, desde o domingo 19 de xullo e ata o 13 de setembro poderase visitar o Cuartel de Dolores, un emblemático edificio construído en 1711 para albergar a Infantería de Mariña e que, na actualidade, continúa cumprindo esa mesma función, sendo o cuartel máis antigo de España en uso.
Regresan tamén as visitas ao Palacio de Capitanía, que terán lugar o primeiro sábado de cada mes e permitirán coñecer un dos edificios máis representativos do Ferrol da Ilustración.
Para participar na maior parte das visitas guiadas será imprescindible realizar inscrición previa a través de WhatsApp no número 696 531 070. O prezo xeral é de 12 euros por persoa e as visitas serán gratuítas para os menores de 10 anos, agás no caso do Palacio de Capitanía, onde a gratuidade se aplica aos menores de 5 anos.
Como novidade deste verán, incorpóranse as visitas gratuítas para grupos ao xacemento de Tralocastro, que se celebrarán do 3 ao 9 de agosto. Será necesaria inscrición previa no correo electrónico arqueodromo.ferrol@gmail.com ou no teléfono 888 013 820. Ademais, a escavación arqueolóxica poderá visitarse libremente os días 30 e 31 de xullo, ás 11.00 e ás 16.00 horas.
A oferta turística complétase co programa Ferrol Activo, que inclúe paseos en barco nas rutas Ferrol-Mugardos (5 euros) e cruceiros pola ría (10 euros), con saídas en horario de mañá e tarde ata o 7 de setembro.
ACTIVIDADES DEPORTIVAS
A programación de verán inclúe tamén os cursos de iniciación á vela lixeira, que se impartirán ata o 31 de agosto nas instalacións náuticas de A Cabana, así como as actividades organizadas polas escolas de surf ao longo de toda a tempada estival.
Como novidade nesta edición, tamén se ofrecerán clases de iniciación ao golf nas instalacións do Club de Golf Campomar.
Ademais, poderase descubrir Ferrol sobre dúas rodas, cunha oferta de aluguer de bicicletas de montaña e eléctricas para explorar o noso territorio de xeito ecolóxico e divertido.
MUSEOS
Outro apartado importante son os museos como o Museo Naval, con entrada gratuíta, que ofrece visitas guiadas para grupos de martes a domingo en horario de mañá e Exponav cun amplio horario de luns a sábado.
O museo da Sociedade Galega de Historia Natural, con entrada de balde, está aberto de luns a domingo de 10.00 a 14.00 horas e o Museo da Semana Santa aberto de 11.00 a 13.30 horas de martes a domingo.
Parada obrigada é o castelo de San Felipe, aberto todos os días de 10.00 a 14.00 horas e de 16.00 horas a 20.00 horas e tamén parada na Concatedral de San Xiao de luns a sábado de 10.30 a 13.00 horas e de 17.30 a 19.00 horas.
A oferta complétase co Tríatlon absoluto Cidade de Ferrol este sábado día 18, a regata de traíñas (1 de agosto), o mercado medieval (do 30 de xullo ao 2 de agosto), Equiocio (do 6 ao 9 de agosto), Feira de Cervexa (do 6 ao 9 de agosto), Campus Chiquibasket (do 10 ao 14 de agosto), Nachiños Fest (14 e 15 de agosto), Rallye de Ferrol (21 e 22 de agosto), Batalla de Brión ( 23 de agosto), Pantín Classic Galicia Pro (22 ao 30 de agosto), Rock en Canido (27 de agosto), XII Concentración vehículos clásicos (29 de agosto), as Festas de Verán (do 21 ao 31 de agosto) e as Meninas (4 de setembro)
A concelleira de Turismo convidou aos visitantes a gozar de todas estas experiencias da ampla oferta de ocio presentada “queremos que o turista regrese a Ferrol despois de ver todo o que ofrecemos e do marabilloso patrimonio cultural, natural e gastronómico que temos”.
