O Concello da Coruña abrirá mañá, mércores 27 de maio, o prazo de inscrición no programa municipal «Coruña no Mar 2026», unha iniciativa que volverá achegar o mar á cidadanía a través de cursos e actividades acuáticas deportivas durante os meses de xullo e agosto.
Tras o éxito acadado nas edicións anteriores, celebradas entre 2021 e 2025, o Goberno municipal impulsa unha nova convocatoria deste programa, que ten como obxectivo fomentar a práctica deportiva no medio mariño e favorecer que a veciñanza se desenvolva nun contorno tan ligado á identidade da cidade como é o mar.
O programa procura ofrecer oportunidades de aprendizaxe e lecer vinculadas ao litoral coruñés, aproveitando o potencial das infraestruturas e entidades deportivas da cidade para achegar o deporte náutico á cidadanía.
«A Coruña ten no mar unha das súas principais sinais de identidade e este programa permite que a cidadanía, especialmente a xente máis nova, poida achegarse ao deporte náutico dunha forma accesible, segura e vinculada ao noso entorno», sinalou o concelleiro de Deportes, Manuel Vázquez. «Queremos seguir consolidando Coruña no Mar como unha oportunidade para descubrir e desfrutar do litoral coruñés a través da actividade física e dos hábitos saudables», engadiu.
A convocatoria está dirixida a toda a cidadanía, atendendo ás diferentes franxas de idade e ás prazas dispoñibles en cada actividade. Como requisitos, as persoas participantes deberán saber nadar un mínimo de 25 metros sen material auxiliar e cumprir coa idade mínima establecida para cada curso, referida á idade que teñan a 31 de decembro de 2026.
O prazo de solicitude permanecerá aberto desde mañá, 27 de maio, ata o día 31 ás 23.59 horas. A listaxe provisional de solicitantes publicarase o 2 de xuño a partir das 15.00 horas e o sorteo público de prazas celebrarase o 8 de xuño ás 12.30 horas. A formalización da matrícula terá lugar entre o 12 e o 18 de xuño, tanto de forma presencial no Palacio dos Deportes de Riazor como a través da plataforma CronosWeb.
As persoas empadroadas no Concello da Coruña terán preferencia na asignación de prazas. Ademais, mantense a posibilidade de realizar solicitudes familiares para facilitar a conciliación.
Os cursos semanais, de luns a venres, terán un custo de 8,74 euros para menores de 18 anos e de 10,92 euros para persoas adultas. No caso dos bautismos no mar, actividades puntuais dun día, o prezo será de 8,73 euros.
O formulario de solicitude estará dispoñible a partir de mañá na páxina web municipal.
Ao final desta páxina poderá descargarse tamén o documento completo coas bases reguladoras do programa «Coruña no Mar 2026».
