O delegado do Goberno, Pedro Blanco, reafirmou na reunión constitutiva do Comité Integrado de Prevención de Incendios de Galicia (CIPIG) que o Goberno porá á disposición de Galicia todos os medios do Estado necesarios para a prevención e extinción de incendios forestais. O delegado participou nesta xuntanza, que marca a pauta para a defensa do monte durante a campaña de alto risco de lumes, coa asistencia dos conselleiros de Presidencia e Medio Rural e distintos representantes dos Ministerios do Interior, Transición Ecolóxica e Defensa.
Pedro Blanco certificou no encontro o compromiso do Goberno de España coa Xunta de Galicia na loita contra o lume a través de medios humanos, aéreos e tecnolóxicos que ofrece desde hoxe e que se estenderán, en moitos casos, ata o mes de outubro. En total, o dispositivo comprometido polo Goberno ofrece preto de 4.000 efectivos entre a Unidade Militar de Emerxencias (UME), Garda Civil, Brigada de Reforzo de Incendios Forestais (BRIF) de Laza e equipos de prevención integral (EPRIF), Terzo Norte da Armada e Exército de Terra, Garda Civil e Policía Nacional.
Ao igual que en anos anteriores, haberá unha decena de aeronaves, entre avións, helicópteros, avións lixeiros e de recoñecemento, que se despregarán ao longo do verán e que permanecerán ata o 31 de outubro nalgúns dos casos. No que respecta aos medios tecnolóxicos, indicou que ademais dos 30 drons que participarán na vixilancia dos montes estará dispoñible o dron de ataque terrestre da UME. Xunto a eles, a Xunta poderá facer uso das imaxes do sistema Copérnico de vixilancia por satélite a través da Dirección Xeral de Protección Civil do Ministerio do Interior.
Aínda que este é o despregamento inicial, o delegado insistiu en que o Goberno deseñou unha campaña de ámbito nacional na que a resposta é coordinada e única, e se fose necesario, os medios despregados noutras comunidades trasladaríanse a Galicia.
Como novidade nesta campaña do 2026, dous equipos de extinción de Bulgaria desprazaranse a Galicia para colaborar e recoller información, ao tempo que se estrean este verán vehículos de intervención aérea e terrestre da UME. Trátase de 10 vehículos pesados de intervención (VPI) e 25 vehículos medios de intervención (VMI) para intervencións en misións loxísticas e operativas.
Neste senso, a UME contará tamén con catro novas máquinas automotrices tele-operadas para misións de ataque indirecto e un guindastre loxístico para recuperacións. Dentro destas adquisicións cobra especial importancia o SVMAC, dron terrestre con autonomía de oito horas que permite realizar labores de roza preto das chamas.
En paralelo, ultímanse coa Xunta os detalles da ‘Operación Centinela Gallego’ e preséntanse actualizacións a nivel normativo coa nova Directriz Básica de Incendios Forestais de Protección Civil, que ten por finalidade, en esencia, establecer os criterios mínimos comúns que han de seguir as distintas Administracións públicas na elaboración dos correspondentes plans especiais de protección civil, dentro dos seus respectivos ámbitos territoriais e competenciais.
Ademais, desde este curso lectivo, o Goberno pon en práctica o Plan de Formación ante Emerxencias, “dinamizando unha sociedade concienciada na prevención”. Consta de material didáctico para que o profesorado de todas as comunidades podan facer uso del nas aulas, con información e contidos que educan nos perigos e realidades que provoca a emerxencia climática en Galicia e en toda España.
Agradecemento aos profesionais
Pedro Blanco aproveitou a ocasión e o comezo da tempada de perigo no eido natural galego para destacar o “enorme labor dos servidores públicos de todas as Administracións na loita contra o lume e a defensa do monte”. O delegado salientou que o seu esforzo, valentía e arroxo “son o orgullo de Galicia e teñen a total gratitude tanto do Goberno como deste delegado”.
Fixo extensivo ese agradecemento aos asistentes á reunión por parte dos diferentes ministerios, nomeadamente o subdirector Xeral Adxunto Operativo de Emerxencias del Ministerio del Interior, Rubén Sande; a subdirectora Xeral de Política Forestal e Loita contra la Desertificación do Ministerio para a Transición Ecolóxica, Elsa Enríquez; a xefa de Protección Civil da Delegación do Goberno, María Dolores Gómez; a xefa de servicio del área contra incendios forestais do Ministerio de Transición Ecolóxica e o Reto demográfico, Elena Hernández; o xefe da Área Operativa de la Dirección Xeral de Protección Civil, Julio Francisco González; o xefe de operacións do V Batallón da UME en León, o comandante Ricardo de la Vega; o xefe Superior de Policía de Galicia, Pedro Pacheco, e o coronel xefe interino da 15 Zona da Gardia Civil, Luis Germán Avilés.
