A vicepresidenta executiva da Federación Galega de Municipios e Provincias (FEGAMP) e alcaldesa de Betanzos, María Barral, ven de participar no acto de apertura do III Encontro de Alcaldesas na cidade da Coruña, xunto coa alcaldesa da Coruña, Inés Rey, e a directora xeral de Promoción da Igualdade da Xunta de Galicia, María Quintiana. No acto tamén proxectouse unha mensaxe grabada da directora xeral do Instituto das Mulleres, Cristina Hernández.
As actividades de este encontro, englobadas baixo o título “Cultura feminista, feminismo na cultura. As alcaldesas falan”, comezaron pola mañá coa sinatura da III Declaración de María Pita, a cargo das alcaldesas participantes de Galicia e de todo o estado, nun acto celebrado no Palacio Municipal de María Pita, no que tamén participou a vicepresidenta executiva da FEGAMP.
A vicepresidenta da FEGAMP na súa intervención felicitou á alcaldesa e as participantes do encontro, sinalando a importancia de encontros como este que “dende a reivindicación e a mobilización permanente, as mulleres estamos a “sacudir” a nosa sociedade e as nosas institucións, sacándoas de inercias condescendentes e situándoas en clave de igualdade real a través de políticas e iniciativas con ese obxectivo”, lembrando que dende a FEGAMP “tamén celebramos recentemente o III Encontro de Alcaldesas e Concelleiras sobre o labor das mulleres como xestoras públicas e emprendedoras, incorporando a perspectiva europea”.
María Barral proseguiu confirmando que “no municipalismo galego, cando falamos de igualdade falamos de milleiros de mulleres implicadas ao longo dos anos que deixaron e deixan o mellor do seu talento e da súa capacidade ao servizo da veciñanza con responsabilidade, bo facer e rendición de contas” e destacando que dende a FEGAMP “poñemos o foco neste labor imprescindible, e non sempre recoñecido, das xestoras públicas, como mulleres que dende os espazos de responsabilidade, e tamén dende os equipos técnicos, sosteñen a administración local e participan nos procesos máis esixentes que afrontan hoxe os gobernos máis próximos á cidadanía”.
Barral salientou que “para a igualdade, a cultura é esencial” polo “cordón umbilical que une a cultura e igualdade como unha forma de pensar e organizar equipos e proxectos pondo no centro a revisión crítica das desigualdades de poder”, sendo máis necesaria que nunca “unha cultura con mirada feminista, que enfoque e revise o relato e a propia política pública para redistribuír poder, previr desigualdades e construír formas de traballo máis xustas e sustentables”.
A vicepresidenta da FEGAMP sinalou que “a FEGAMP hai tempo que se incorporou ao grupo de institucións que claramente traballan pola igualdade e polos dereitos das mulleres nos nosos ámbitos, como organización dos concellos e das entidades locais galegas” estando o municipalismo galego aliñado “coas grandes decisións e accións en defensa dos dereitos das mulleres e da igualdade”.
María Barral rematou a súa intervención lembrando o reto asumido dende o municipalismo galego ao comezo deste período, de acadar a paridade nas corporacións e nas alcaldías galegas nas próximas eleccións en 2027, lembrando que “a vocación do municipalismo galego é seguir estando na vangarda das políticas de igualdade, e nese camiño queremos volver a encontrarnos con todas vos”.
