Ourense volverá abrir a porta a universos infinitos coa celebración da súa Feira do Libro, que se desenvolverá do 17 ao 20 de xuño no Parque de San Lázaro, reunindo nove librarías participantes e preto de medio centenar de autores e autoras entre presentacións, encontros e sinaturas. O recinto permanecerá aberto en horario de 11.00 a 14.00 horas e de 18.00 a 21.30 horas.
A feira arrancará o mércores 17 de xuño cun acto inaugural especialmente simbólico. Ás 13.00 horas, os escritores Alba Guzmán e Óscar Guzmán serán os encargados de pronunciar o pregón, converténdose nunha das imaxes máis fermosas desta edición: a dun pai e unha filla unidos non só polos afectos, senón tamén pola paixón pola literatura e pola creación.
Ao longo de catro días, a carpa de actividades ofrecerá unha programación diversa e pensada para todos os públicos. O propio mércores, tras a inauguración, a literatura converterase nun xogo grazas a A tradutora secreta, unha escape room organizada por Árbore Azul, seguida dun obradoiro de creación de fanzines impartido por Branca Trigo e dunha conversa entre Isaac Pedrouzo e María Nieto arredor da novela David y Claudia e a relación entre música e literatura.
O xoves 18 de xuño a programación continuará coa presentación das publicacións editadas pola Deputación de Ourense durante 2025, para dar paso pola tarde a Ler para crer, un espectáculo de ilusionismo familiar de Joshua Kenneth que reivindica a maxia da lectura, e a unha actividade da ONCE dedicada á historia e á importancia do libro Braille, guiada por Corina Alfonso.
O venres 19 de xuño chegarán os seres fantásticos da tradición galega da man de David Rodríguez, nun obradoiro destinado a descubrir as criaturas marabillosas que habitan o noso imaxinario, e a xornada rematará coa presentación de La cámara de las maravillas, a nova novela de María Oruña, nun encontro no que estará acompañada polo xornalista e escritor Javier Fraiz.
Xa o sábado 20 de xuño, Fernando Méndez presentará La clave de Mozart, mentres que Cris de Caldas achegará ao público familiar o espectáculo A bibliotecaria estrafalaria, unha proposta chea de contos, humor, música e mesmo un chisco de maxia. A programación pecharase coas Conversas Follas Novas, nas que Lucía Belarte e David Lorenzo protagonizarán un obradoiro arredor de A panadería, unha das obras distinguidas nos premios do sector editorial galego.
As casetas das librarías participantes —Aira Editorial, Espazo Lector Nobel, Libraría Pedreira, Libraría Cartabón, Deputación de Ourense, A Gata Tola, Librería Uróboros, Planabooks Editores e Biblioteca Pública de Ourense Nós— converteranse ademais nun espazo de encontro permanente entre lectores e autores.
Con entrada libre e cun desconto do 10 % en todos os libros, a Feira do Libro de Ourense volverá converter durante catro días o corazón da cidade nun espazo para a conversa, a descuberta e a celebración compartida da lectura.
