A senadora do BNG, Carme da Silva, interpelará na Comisión de Traballo ao Secretario de Estado e reclamará adoptar medidas contundentes e inmediatas para facer frente ao aumento sostido da sinistralidade laboral na Galiza. Da Silva sinala que este realidade é “totalmente inaceptábel” e evidencia “graves eivas no sistema de prevención e control”.
Segundo os datos manexados pola organización nacionalista e as noticias que se recollen nos medios de comunicación, tanto o número de accidentes laborais como os sinistros mortais foi en aumento na Galiza nos últimos anos. Esta situación, explica a senadora do BNG, require de “moito máis que declaracións de intencións” e, polo tanto, “obriga a actuar con compromiso e decisión” co obxectivo de garantir a seguranza e a saúde das persoas traballadoras.
“Estamos a falar de vidas humanas, de familias afectadas e dunha realidade que non deixa de empeorar sen que se adopten medidas á altura das circunstancias” recrimina.
Ante esta situación, a senadora do BNG sinala a insuficiencia de medios na Inspección de Traballo e Seguranza Social na Galiza, denunciando que o actual cadro de persoal e os recursos dispoñíbeis resultan claramente insuficientes para facer frente ás necesidades do tecido produtivo galego e ás súas particularidades.
Do mesmo xeito, Carme da Silva advirte que a falta de control efectivo “favorece o incumprimento da normativa en materia de prevención de riscos laborais e contribúe a perpetuar situacións de precariedade e inseguridade”.
Entre as medidas que a organización nacionalista lle formulará ao Secretario de Estado destaca a necesidade de incorporar máis cadro de persoal da Inspección de Traballo na Galiza, tanto no corpo de inspectores e inspectoras e subinspectores/as como no persoal técnico e administrativo, co obxectivo de garantir unha actuación eficaz e suficiente.
“Esta ampliación deberá ir acompañada dun reforzo dos medios materiais e tecnolóxicos que permitan desenvolver con garantías as funcións de vixilancia, control e esixencia do cumprimento das normas legais, regulamentarias e do contido normativo dos convenios colectivos” afirma Carme da Silva.
A maiores, a senadora do BNG insiste na necesidade de desenvolver políticas integrais de prevención de riscos laborais que vaian máis alá da actuación inspectora, promovendo a formación, a concienciación e a responsabilidade empresarial, así como reforzando a coordinación entre administracións e axentes sociais.
Por último o BNG defenderá ante o Goberno abordar o traspaso á Xunta da Galiza das competencias en materia de Inspección de Traballo, incluíndo funcións, servizos e xestión, co fin de adaptar a súa organización e estrutura á realidade laboral galega. “A xestión directa desde o país permitiría unha maior proximidade, coñecemento do territorio e capacidade de resposta ante as problemáticas específicas do mercado de traballo galego” incide Carme.
