Comisións Obreiras (CCOO) presentou hoxe en conferencia de prensa unha campaña de prevención dos riscos derivados da calor extrema nos centros de traballo e reclamou reforzar a negociación colectiva para garantir a protección da saúde das persoas traballadoras fronte a fenómenos meteorolóxicos cada vez máis frecuentes e intensos. «Fronte ao sol: sombra, auga fría e xornada reducida» é o lema da iniciativa do sindicato, dada a coñecer publicamente en Ourense por ser onde se rexistran as temperaturas máis elevadas; no verán de 2025 alcanzáronse os 42,9 graos en xuño, un récord histórico para ese mes, e superáronse novamente os 40 graos en xullo e agosto.
Perante os medios de comunicación interviñeron Alejandra Gesto, secretaria xeral de CCOO-Hábitat de Galicia; Carmen Villar, secretaria de Saúde Laboral desta federación; e Aida Suárez, secretaria estatal de Saúde Laboral e Política Enerxética de CCOO-Hábitat. Durante o acto, advertiron de que adaptar o traballo ao cambio climático «xa non é unha opción, senón unha obriga legal, social e ética». Así mesmo, subliñaron que as altas temperaturas afectan a catro de cada dez persoas traballadoras no Estado, nun contexto en que só o 8 % das empresas conta con plans específicos de actuación fronte a fenómenos meteorolóxicos adversos.
O aviso laranxa obriga a adoptar medidas
Na conferencia de prensa, o sindicato puxo o foco na situación de Galicia, onde o pasado verán houbo dúas importantes vagas de calor. A primeira desenvolveuse entre o 18 de xuño e o 4 de xullo, mentres que a segunda se prolongou durante 16 días consecutivos, do 3 ao 18 de agosto. Segundo o rexistro de alertas elaborado por CCOO-Hábitat a partir dos avisos da AEMET, Ourense foi a provincia galega que máis días acumulou con aviso laranxa, rexistrándose un total de 18 en toda a comunidade autónoma.
CCOO lembrou que o Real decreto lei 4/2023 establece medidas obrigatorias nos traballos ao aire libre en función dos avisos meteorolóxicos. Así, o aviso laranxa obriga a adaptar ou reducir a xornada laboral, mentres que o aviso vermello implica a prohibición das tarefas de risco.
Crecente impacto da calor extrema
O sindicato tamén alertou do crecente impacto sanitario da calor extrema. As defuncións atribuíbles ao exceso de calor na época estival pasaron en Galicia de 203 en 2024 a 397 en 2025, o que supón un incremento do 95,6 %. CCOO advertiu de que os efectos das altas temperaturas van moito máis alá dos golpes de calor, xa que a exposición prolongada incrementa a sinistralidade laboral e agrava patoloxías cardiovasculares e respiratorias. De feito, segundo o Informe do Plan nacional de actuacións preventivas dos efectos do exceso de temperaturas sobre a saúde, en Galicia non se rexistrou ningún falecemento por golpe de calor en 2025, un dato que confirma que o verdadeiro risco non reside nos episodios máis visibles, senón nesa mortalidade menos evidente.
Os sectores encadrados na Federación do Hábitat de CCOO figuran entre os máis expostos a esta situación, ao desenvolveren boa parte da súa actividade ao aire libre ou xunta focos de calor. É o caso da construción ou das actividades forestais, ámbitos en que o traballo á intemperie agrava os efectos das altas temperaturas e nos que o sindicato concentra a súa acción preventiva e a reivindicación de protocolos específicos na negociación colectiva.
No ámbito da construción, a propia base de datos de CCOO-Hábitat rexistrou cinco falecementos por accidente laboral en Galicia entre xaneiro e maio de 2026. A esta sinistralidade do sector súmase a do conxunto da actividade laboral: segundo o avance do Ministerio de Traballo e Economía Social, entre xaneiro e abril de 2026 contabilizáronse en Galicia 9394 accidentes de traballo, catorce deles mortais, dos que 1006 corresponderon á provincia de Ourense, con dúas vítimas mortais.
CCOO lembrou igualmente que, en situacións de calor extrema, as empresas teñen a obriga de adaptar horarios, reorganizar tarefas e reducir a exposición durante as horas de maior risco, amais de garantir auga potable, zonas de descanso e sombra, ventilación adecuada e equipamentos de protección adaptados ás condicións ambientais. O sindicato insistiu en que a adaptación da xornada durante os días de alerta non é unha recomendación, senón unha obriga legal, e reclamou que a calor sexa tratada como un risco laboral estrutural en Galicia.
