O Concello de Rianxo vén de resolver a primeira convocatoria da liña municipal de axudas destinada a apoiar a actividade comercial e a posta en marcha de novos negocios no municipio, unha iniciativa que no que vai de 2025 mobiliza un total de 20.000 euros.
Por unha banda, mantense aberta unha convocatoria de 10.000 euros dirixida ás asociacións empresariais, co obxectivo de dinamizar o comercio local a través de accións colectivas que reforcen o tecido económico da vila. Trátase da segunda vez que se impulsa esta liña de subvencións.
O alcalde rianxeiro, Julián Bustelo, sinalou que estas axudas teñen como finalidade «impulsar a actividade económica do municipio, reforzar o tecido empresarial e crear oportunidades de emprego para a veciñanza», apostando polo pequeno comercio como motor de desenvolvemento local.
Estas subvencións complétanse cunha segunda liña orientada a favorecer a implantación de novas empresas e comercios, que contempla achegas de ata 2.000 euros por proxecto para facer fronte aos gastos iniciais da creación de novos negocios.
Unha vez resolta a primeira convocatoria, o rexedor visitou esta semana a Rosana e Ariel, dúas das persoas beneficiarias, que nos últimos meses puxeron en marcha os seus proxectos empresariais en Rianxo, dándolle unha nova vida a baixos comerciais que permanecían pechados.
Desde o goberno local avanzan ademais que esta política de apoio ao comercio e ao emprendemento terá continuidade no ano 2026, co obxectivo de seguir fortalecendo a economía local e o emprego no municipio.
